林熹瞳走入校區扮學生妹
「怪談女」林熹瞳（Rachel）平日帶觀眾出入靈異之地，發掘種種令人膽戰心驚的秘聞，這次要她換上一身校服女生look，走到學校區扮女學生，Rachel除帶來了一份城市驚喜外，還有一份繾綣回憶。
特地走到學校區扮女學生的Rachel，日前穿起恤衫、格仔校裙，配上毛冷衫，她說：「我超鍾意着校服，仲好鍾意自己燙校服，我覺得啲校服燙到直一直，感覺好整齊、好靚，我仲鍾意用斜孭袋，仲會扣好多襟章上去，不過後來好多同學都用斜孭袋，我就轉用側孭袋。我讀初中時考過全級第一，最鍾意中文、歷史同世界歷史，因為我鍾意聽故事，呢啲科目有古仔聽嘛！」
失戀成績變差
Rachel當然也像不少中學生一樣，發過一些豆芽夢，她說：「中三嗰年同個中四嘅師兄拍拖，我啲成績由全級第一，跌到落全班第七，就算後來分手，都考唔番嗰個成績。會考嗰期仲撞正失戀，本來要溫廿課書，結果溫到四課就去考，不過當時我已經決心要讀演藝，未收到會考成績單，演藝已經收咗我，我開心到喺屋企轉咗三個圈，雖然後尾會考都合格，仲有雙位數成績，但唔使同人搶中六學位，起碼唔使愁冇學位先！」
採訪：影視組
攝影：李廣成
服裝：Loveshop @ gi商場