趙彤執二攤好興奮
趙彤執尹蓁晞二攤，接演鄧特希監製的亞視處境劇《親密損友》，日前她與尹的師姐趙碩之在亞視碰頭，並坦言以最興奮的心情來「執二攤」，更大爆緋聞男友霍啟剛與女友郭晶晶已互相視之為「老公」、「老婆」，大方得出奇。
尹蓁晞（Yumi）再衰「瘟仔」遭經理人公司雪藏兼追討可謂有排煩，所屬經理人戴夢夢日前隨有份演出《親》劇的趙碩之（Wylie）出現亞視傾劇本，夢夢就Yumi失場一事向記者說：「此人已不值一提，公司最嬲唔止金錢上損失，而係聲譽上嘅損失！（Yumi繼續失蹤？）佢返咗香港，但未出現，等佢自己打電話嚟啦，（佢做乜失蹤？）拍拖囉！我哋放棄佢架啦！」
經理人開到口徹底放棄Yumi，作為其師姐的Wylie看在眼裏，公司對不聽話藝人「手起刀落」，Wylie當然不敢怠慢；日前她為新劇《親》返亞視與大班演員傾劇本，見Wylie相當投入，同場更與接替師妹一角的趙彤碰上，有演戲經驗的Wylie，並未有擺阿姐款，反之更與趙彤傾得投契，還向她說：「做戲唔好學我，廣東話就學我啦！」
爆霍啟剛戀得專一
挾着與「富二代」霍啟剛緋聞女友入行的趙彤，從內地來港拍過台灣偶像劇，趙彤自言演出經驗不算豐富，即使在劇中sell「胸大無腦」亦不介意，莫講話「執二攤」：「我唔介意，呢啲係咪叫豬頭骨？我心情仲好興奮添！（留港拍劇有冇問霍啟剛意見？）娛樂上嘅嘢唔會問，反而會問公事，（公事？）因為有公司搵我做非執行董事，唔使點做，都係sell我個人，但佢話唔熟就唔好做！（你哋傳緋聞有冇諗過嫁入豪門？）冇諗，只係想有幸福嘅婚姻，（霍啟剛同郭晶晶算唔算係童話？）佢哋喺我心目中係一對，佢哋一早就視對方為老公、老婆啦！（請飲會去？）一定去，但人情就要儲吓錢先！」
文、攝：影視組