王宗堯練泰拳雙重武裝
影壇新血兼譚詠麟契仔王宗堯（Greg）為擴闊戲路，日前踩入泰拳館練大隻，積極裝備自己，顯示能文亦能武的實力！原來Greg有西洋拳底，他說：「泰拳都玩過吓，不過我熟西洋拳多啲，泰拳埋身肉搏，出手狠，招招置對方於死地，西洋拳比較重謀略，諗過度過先出招。」
有功夫底果然唔同，Greg打沙包熱身後，戴上拳套跟師傅對打學嘢，拳腳有板有眼，但不及師傅敏捷險些食「拳餅」，標晒汗的他大呼好玩，笑道：「唔知男性係咪受賀爾蒙影響特別鍾意刺激，鍾意打人同畀人打！（試過打傷？）拍打戲曾拉傷，玩西洋拳嗰陣有次打到con都飛甩埋！」
場地、服裝：榮拳會