婷婷嫁硬安志杰等阿媽催婚

謝婷婷與男友安志杰拍拖多年，感情穩定，更不時以情侶檔抓銀，昨日兩人出席麥當勞結婚派對服務記者會，婷婷與男友不約而同穿上藍色短裙及西裝，十指緊扣出場，婷婷全程翹實男友，又伸手摸男友胸襟，最後應大會要求餵男友食包，期間安志杰嘴角沾滿漿汁，細心的婷婷即徒手為對方抹嘴，醒目的安志杰即親吻女友面頰。

冇定幾多老婆本

問到何時拉埋天窗？婷婷說：「唔知。」問到安志杰是否求了婚？怕醜仔的他說：「唔知。」婷婷即為對方解圍說：「唔好逼佢，我哋係有呢個打算，不過我哋嘅性格係要有大人逼先會做，暫時兩家嘅父母都未逼。」問安志杰要儲多少錢才肯娶婷婷？他說：「冇一定數字，儲得愈多愈好。」

婷婷為安志杰抹嘴，夠晒體貼。

婷婷獲安志杰當眾錫錫，一臉冧樣。

飛約旦探男友班

婷婷笑言希望男友廿四小時在身邊，她說：「尋晚好早就瞓咗，希望今日快啲到，可以見到佢。（唔係成日見？）唔係架！」問到是否要廿四小時見到男友？婷婷一副冧樣望實男友說：「當然最好啦。」由於安志杰稍後會到約旦拍戲半個月，婷婷為解相思之苦決定請假飛到當地探班。

採訪：音樂組