萬人迷愛‧簡單

愛情不是人生的所有，卻能為人生添上色彩。214情人節過去了，緊接下來就是314白色情人節。想有個難忘的情人節，首要有個難忘的情人，未知一班萬人迷明星名模，或是高高在上的富貴名人，他們的愛情經歷是否如凡人你我他呢？

連詩雅：「有人為咗我生日去學畫畫一個月，畫咗幅我嘅人像油畫，收到嘅時候真係好surprise！」

區文詩：「有一年我生日，男友喺前一晚失蹤！之後突然打畀我，叫我求其執啲行李，去泰國食一餐飯！嗰間餐廳好靚，有一條長樓梯。佢叫我去toilet，出去嗰時佢去咗鋼琴度彈琴，等我喺琴聲襯托底下走出嚟！」

馬詩慧：「喺我哋結婚十周年嘅時候，老公（王敏德）送咗個用金造嘅公公婆婆擺設畀我，話希望我同佢好似嗰對公公婆婆咁，佢坐喺搖搖櫈，我就織冷衫。」

楊愛瑾：「我從小嘅夢想就係同男友去落雪嘅地方，睇吓風景，飲杯熱朱古力，互相攬住嚟取暖，淨係咁樣已經好難忘。」

鄧紫棋：「最難忘有一個星期六，即興同男友一齊自己畫地圖，去荒山野嶺探險。其實成件事好無稽，我哋揸摩托車去到荒山野嶺，喺嗰度逗留咗兩個鐘，天氣又凍！」

周秀娜：「最難忘嘅都係同我依家嘅男朋友，雖然一齊都三年，但佢仲會花好多心思喺我身上，好似啱啱過去嘅情人節，佢就靜雞雞買咗99支玫瑰送畀我，又將所有送畀我嘅禮物擺低，然後自己就走，我覺得好驚喜。」

盧頌之：「初戀男朋友話想我做佢女朋友時，佢帶咗我去朗豪坊最高嗰層，扮晒好驚咁，跟住就捉住我問我可唔可以做佢女朋友，印象好深刻。」

裴殷：「初戀時同隔籬學校嘅男仔拍拖，我哋係摺紙飛機識嘅，我將自己個名同電話寫咗喺上面再飛過去畀佢，所以係我追佢，佢收到之後就開始約我喇。」

李蘢怡：「中學個男朋友約我但唔話畀我知去邊，之後帶我去咗間好靚嘅餐廳食飯，又送花畀我，已經覺得好浪漫。」