江欣燕逼寇鴻萍公開御夫術

寇= 寇鴻萍　　　　江= 江欣燕

江：我哋咁多年朋友，見到你同老公Patrick（梁廷鏘）孖公仔，但你老公風度翩翩，我真係好想知你點應付啲女仔埋（老公）身？

寇：冇架……冇呢啲情形發生！

江：我都知你有好多線眼……

寇：你老公都有出嚟玩，咁你有冇擔心？

江：我都唔擔心得咁多！

寇：夫妻間講信任嘅，我識我老公時佢都係成年人，見過晒世面，不過欣欣你既然敢問我，我都想同大家分享，因為冇人問過，你問得好好！其實，只係佢搞酒吧要出去睇吓生意就冇辦法，除此之外，我哋兩個成日都一齊，佢做生意嘅朋友我都識晒！

江：Patrick係好正經嘅生意人嚟……（認真地說）

寇：多謝你呀！

江：但總有啲女人仰慕你老公，你點應付？

寇：當佢要出Trip，中東就唔怕，都見唔到啲女人個樣（包住頭），如果去內地，我都會提佢o架！

江：係咪提叫佢帶呢個……（用手勢做避孕套）

寇：梗係唔係啦，畀我摷到都死！不過大家好珍惜呢段婚姻，我都有提住佢「我好愛你架」、「你睇我哋個屋企幾幸福」咁，佢自己會識諗！成日話兩公婆感情要好似放紙鳶咁，但我都要提佢我有幾咁快樂，要大家一齊維繫，久不久又提吓。男人唔可以直斥其非，好似拍拖時我講過佢着衫唔靚，佢都可以嬲我一日！

江：你老公個Case（涉姦案），你點樣輔導佢個思想？

寇：個Case未完我唔講得，不過我哋係一家人，只要佢覺得係啱，我都支持，咁當然係唔犯法嗰啲。好似佢覺得食煙係開心嘅，我都支持，咁先係一家人嘛！

為愛女乜都肯做

江：你同兩個女嘅關係都好好，之前大女件事（盆景貓）你都好偉大，幫佢出嚟講sorry！

寇：我個大女性格好強，做阿媽，我係過分擔心，嗰件事（盆景貓）我都有安慰佢，我話既然一般人唔接受咪出嚟認錯囉！但我個女當時唔係咁諗，佢係話想叫人關注，係黑色幽默。

江：佢唔了解網絡界個威力，一人一啖口水都可以浸死你！咁你出嚟認錯，個女有冇覺得你好偉大？

寇：有，喺個Blog講，呢件事都係我同個女嘅相處經歷，係要溝通，因為家庭永遠都有「愛」！

識於微時 大談發迹史

江：細個同你一齊做EYT（歡樂今宵）就識，你又係港姐，好靚、好lady，後尾結婚又生咗兩個女，好幸福！但你都好上進，一路都有讀書。（表情好羨慕）

寇：今年交埋份論文，出年MBA畢業喇！其實，欣欣我對你都好深印象，嗰時你眼大大、小妹妹咁，好靜、唔敢講嘢。

江：當時好驚，喺我眼中個個都係大人，尤其見到拉姑（狄波拉）就好驚，可能佢當年做「雷茵」（電視劇《狂潮》角色）好惡！其實做藝人好難轉行，點解後來你轉咗去做金融？

寇：參加選美之後喺電視台五年，做過《婦女新姿》、EYT，結婚後生咗兩個女，做全職主婦，但有專人湊BB，冇嘢做就搵朋友食飯打發時間，好似蛀米大蟲！但留喺屋企蓬頭垢面嘅生活我又唔鍾意，我都學過插花、烹飪，又覺得無聊。我朋友個老公係金融行Director，後來佢叫我去做實習，咪轉去咗做金融囉！

江：我當時都有幫你開咗個細細哋嘅戶口「整蠱你」。

寇：嗰時我做得好開心，原來做金融可以喺中環返工，四點幾就tea，跟住又shopping，兩萬蚊件皮褸都買，賺得多但使得快。

江：有冇買埋一份？

勁蝕兩架Benz跑

寇：本來冇就仲好，點知97股災冇咗兩架Benz跑！好在近呢兩年做咗事務策劃，積蓄都有番啲增長。

江：智慧都有增長！

寇：係喎，因不停接觸世界，我又鍾意交朋友，好似iPhone我都識玩，同身邊太太比較，我係最叻嗰個！

江：哈哈，iPhone我等緊第八代！（意指自己更in）

調節夫婦間節奏

寇鴻萍與梁廷鏘（Patrick）關係要好，二人每年都會去旅行享受人生，其中坐郵輪旅行更是Patrick的喜好。寇鴻萍笑說：「每年我哋都有幾個月唔喺香港去咗旅行，我老公十年前已好鍾意坐郵輪，佢覺得好舒服。佢比較慢節奏，我就急性子，但兩個併埋，好似坐郵輪去旅行咁，對我嚟講都可以調節吓！」

欣欣稱暫不能接受坐郵輪旅行，她形容為「困獸鬥」般，好悶，最好待至退休時才去「享受」。相反阿寇則因「愛老公」而視之為享受：「因平時我衝到好『行』，佢好就我，所以我都要欣賞佢嘅嘢，一家人嘛！好似今年情人節，我個女都SMS畀我老公，但竟然冇畀我……可能阿女覺得畀Patrick即係畀我！」

少年反叛 跟佬出走

江欣燕少年反叛，當年參加《新秀》又拍拖，令家人十分擔心：「反對拍拖囉！當然會擔心……破咗（處女身）……」十八歲生日當天，欣欣與朋友慶祝後凌晨返家卻吃閉門羹，她憶述時都眼濕濕：「阿爸出嚟開門，但氣氛好僵！有幾錯呢？我都同家人食咗十七年蛋糕啦！但阿爸就好唔開心！我入行做EYT後同個師兄男仔（張衞健）曖昧啲……佢結咗婚都唔怕講啦，我仲離家出走，但嗰晚又唔記得返EYT，真係搞笑……但阿媽就好傷心囉！」

採訪：影視組

攝影：司徒國榮

場地：L16 CAFE&BAR

髮型：江欣燕：RAYMOND CHAN@LA CHIOMA／寇鴻萍：John Tsang@ViaⅡColpo