JC省靚警鐘敲響荷里活
混血模Jessica C.的「警鐘胸」響遍全港，事業如日方中，她卻突然撤離香港市場到美國試鏡。深明自己優點的JC，花盡心思保持「警鐘胸」最佳狀態，希望早日在荷里活闖出名堂。
失敗乃播種之母
JC早前走到美國試鏡，雖然至今未見成果，但她不認為失敗，反而覺得是為日後鋪路，成功在當地播種。她坦言：「預咗喺美國由零開始。」決定省靚招牌「警鐘胸」。
我對演戲有興趣，細個做模特兒拍電視廣告嗰時已經發現。我覺得唔同模特兒有唔同階段，年紀大可能對事業有影響，我都做咗七年模特兒，要轉型，應該話係想多元化啲，令我嘅演藝事業長壽啲。
之前拍咗電影《熱浪球愛戰》，依家仲摸索緊條路，但我係真心鍾意拍戲。去美國係初步試鏡，有護膚品廣告、大小電影都試。放長假前用咗兩、三個星期去簽經理人公司，同埋影新造型照，因為嗰邊要唔係好化妝嘅相。
預咗喺美國由零開始，知道冇乜人識我，唔當今次係失敗，目標唔係要做巨星咁遠，而係按部就班，唔播種就冇收成。其實都唔係冇成果，因為充電完之後個人開心咗。我着重保養身材，成日做gym令身體保持最佳狀態。食嘢亦好清淡，一向都唔係大魚大肉，平時食沙律、奶類嘢，有時食啲雞肉，就嚟食齋咁。最近瘦咗，想肥番少少，所以會食甜嘢增肥，都係靠朱古力同雪糕。
沒有敵視接班人
憑Canon廣告揚名香港的JC甫到美國發展，即有第三代及第四代新女郎Melanie Z.及Alice B.攝位。但兩女就不約而同表示不想與她走相同的路線，亦不屑有「警鐘胸」。對此JC大方謂不會敵視她們，更有留意她們的動向，甚有大將之風。
知道有新一代Canon女，平常心面對，如果佢成名，都係佢還佢，我還我，從來唔想將自己同任何人比較，因為每個人都各有長短處，多啲唔同類型嘅model有助市場發展。即係等如你冇可能攞我同巨星比，亦冇理由攞我同新人比。
享受拍拖拒閃婚
唔想咁快結婚，享受吓拍拖先。我個人外表細個，但思想成熟，冇咁衝動，閃婚潮影響唔到我。至於佢係唔係我嘅真命天子？哈哈……有諗過夢想婚禮係水上派對，我太鍾意陽光與海灘喇！不過婚姻實在太長遠，我唔鍾意畀人管，唔想畀枷鎖限制，我係一應承咗就會實踐嘅人，睇承諾睇得好重，所以唔會咁輕易去承擔婚姻責任，但我依然好照顧男友同佢屋企人。知道Sergio喺日本冇咁hit，我都冇咁着重嗰邊嘅市場，我哋適合香港同美國市場，知道有情侶模特兒因為唔同市場，要分開發展而搞到分手。慶幸我哋可以一齊嚟亞洲發展，依家只係想爭取喺同一個市場做嘢。
今年絕迹寫真戰
JC是去年冒起的性感女神，全裸玩蛇的寫真照令人留下深刻的印象。她直言今年再拍寫真的機會渺小：「客觀環境唔許可，但機會比較細。稍後會再去美國，未知幾時返，我估去兩、三個月，七月返到香港又排晒工作，真係冇時間影。如果要我再影，一定要有原因。舊年我係性感女神，配合番形象去影，已經去到好性感。依家未諗到理由去做，唔跟呢個寫真趨勢走，或者會用另一種形式表現自己。」
口述：Jessica C.
筆錄：專案組
攝：黎志輝
場地：新太陽廣場