鬧市真人騷 子珊卓羲當街咀尷尬
徐子珊及吳卓羲前晚不理途人目光，大膽於旺角街頭熱吻！原來二人只為新劇拍攝一場咀戲，私底下是老友的他們都表示做情侶已合作多次，故拍咀戲不會咀出真感情。
《法證先鋒III》日前於旺角街頭取景，劇情講徐子珊與吳卓羲激咀，因為正值放工時間，故引來大堆市民圍觀。子珊坦言感到尷尬：「其實同佢都錫慣錫熟，做過情侶好多次，起碼錫過三次。不過以前就喺廠拍，唔似得依家大街大巷係咁錫，所以都覺得尷尬。（成日咀唔怕有感情？）幾年前唔會，依家都唔會。（事前有冇做好準備工夫？）有食香口糖。」
幾日唔食蒜
曾經咀過黃宗澤和馬國明，子珊被問到連埋吳卓羲三個，他們誰最好咀？她說：「唔好問啲咁尷尬嘅問題啦，大家都係朋友，不過應該係吳卓羲啩。因為我哋有默契同埋咁熟，當佢係兄弟。」而吳卓羲揚言與子珊親嘴沒太大感覺：「都係工作啫，OK啦。因為喺街頭錫及電視尺度問題，都只係蜻蜓點水，唔會法式濕吻啦。（有咩事前準備？）幾日前知道要拍呢場戲，都唔食蒜頭呢啲嘢，唔想有口氣。」
文：影視組