母子溫馨行超市 栢芝掃乾糧北上開工
張栢芝回港兩日行程緊湊，前晚跟老公謝霆鋒甜蜜蜜食飯咀嘴後，昨晨又再出動與Lucas行街買日用品，她直言回港全因要搞兒子學校事宜及拍廣告，之後便返回內地為兩片開工。
栢芝前日被拍得與霆鋒及朋友開餐，期間情到濃時當眾咀嘴晒恩愛！飯後，二人甜蜜蜜翹到實離開餐廳。
昨日，栢芝又再出動與囝囝Lucas行街，見她推着BB車穿梭超市，執了不少日用品及乾糧，似為返內地拍劇做準備。除此之外，栢芝亦不忘買一些Lucas喜歡的小食逗他開心。
為《楊門女將》埋尾
記者上前問栢芝，放假兩日行程相當豐富？栢芝表示：「我都想放兩日假，我返嚟係為咗幫Lucas搞學校嘅嘢同拍廣告。（尋晚影到你同霆鋒食飯喎？）咁開工都要食飯架，我拍完廣告咪會合一齊食飯。（幾時返內地拍《楊門女將之軍令如山》呀？）之後就返內地開工架喇，今次會返去拍《無價之寶》同《楊門女將》，晶哥（王晶）好好，畀咗期我返《楊門》劇組埋尾。」
文：影視組