無綫藝人李思欣昨日接受電台訪問宣傳新劇，經常飾演古裝與悲慘角色的她說：「好開心監製拍古裝就會諗起我，至於時裝劇，希望做番正經角色，之前好似唔係畀人強姦就係死。」她又大讚於《洪武三十二》中有份演出的江若琳聰明。
此外，對於佘詩曼不續約無綫，曾與對方合作的思欣說：「佢做戲真係好好，個樣好入屋，走咗真係一個損失，（你擔正機會大咗？）問心自己仲有好大段路走，咁當然想，嚟緊套劇會演個憶子成狂嘅角色，希望有回響，（有信心攞獎？）冇諗，只希望觀眾會鍾意。」
