徐子珊嘆Isabella童話幻滅
梁洛施（Isabella）豪門夢碎，令一眾女星引以為鑑，徐子珊慨嘆童話幻滅，揚言自己心頭唔高，搵到豪門先算！而Isabella曾與英皇反面割席，林峯被問到會否支持她復出拍戲？林峯竟暗寸說：「又入返我哋公司（英皇）呀？」
梁洛施和李澤楷分手轟動娛樂圈，成為全城熱話，徐子珊昨日出席「必理痛『齊』撐動全城大召集」時，坦言唔識Isabella，但對於他們分手感到可惜，有指撫養權高達30億？子珊說：「人哋嘅事唔方便講太多，但係一個童話嘅幻滅，覺得好可惜！（諗過嫁入豪門？）我心頭冇咁高，搵到先算啦！」
林峯口啞啞
至於跟Isabella曾是同門的林峯，昨日與楊千嬅出席無綫電影台活動，對於跟英皇「不歡而散」的Isabella跟李澤楷分手後，有傳可獲30億撫養權，身為英皇歌手的林峯說：「30億？真係呀？不過呢啲嘢都係畀番佢哋自己解決啦！（贊唔贊成佢復出？）吓？又入返我公司？（歡迎佢嗎？）我真係唔知喇，不過之前一直都未有機會合作！（佢有30億可以買間公司做老闆娘？）嘩，咁深嘅啲問題，唔識答呀。」
楊太拒評論
而英皇集團（國際）有限公司主席陸小曼（楊受成太太），昨日代表集團出席登山慈善活動，對於梁洛施宣布跟李澤楷分手，楊太表示未睇報紙不知道消息，封嘴拒評論。
採訪：音樂組