楊秀惠：生小朋友要三思
梁洛施驚爆與李澤楷分手，圈中人議論紛紛，一眾曾羨慕女方的藝人均覺可惜，但理智一族卻關心兩人的下一代會否受到影響。
陳法拉：共同撫養小朋友係好事，小朋友係需要父母關心，大人關係上有咩變動都好，小朋友都係好緊要。傳媒經常注重喺佢哋嘅身家同埋贍養費，但係感情唔單止呢啲，我諗背後一定有原因。希望大家畀啲空間佢哋，好好保護啲小朋友啦。
楊秀惠：戀愛係好自由嘅，如果真係唔適合都要無奈分開，佢哋嘅聲明都話咗會共同撫養小朋友，會負責任，不過呢件事都話到畀人知無論生小朋友或者養寵物真係要三思。
馬浚偉：一路佢哋都好恩愛幸福，仲生埋仔，以為佢哋會白頭到老。不過佢（梁洛施）處理得幾好，幾鍾意佢喺聲明度話會合力照顧小朋友，希望啲小朋友都會開心健康啦。
任賢齊：我同Isabella只見過一、兩次面，但冇合作過。件事都幾突然，聽講佢啱啱生咗BB，但呢啲係人哋私人事，我唔方便評論！兩個人分開當然唔係好事，小朋友需要喺一個完整環境下成長！（有傳三位小朋友的撫養權高達30億？）30億？唔知點答，呢啲唔可以講笑。
楊千嬅：我有睇報道，不過始終係兩個人私人事，外人唔方便批評，自己事自己解決到就OK，發得聲明相信都已經有晒共識。
鄭欣宜：佢哋兩個成年人自己嘅事唔關我哋事，不過我覺得值得開心嘅係佢份聲明入面有提到當中嘅小朋友點處理，呢樣嘢先係最重要。
洪卓立：好驚訝！初時睇到微博都唔信，雖然我同佢唔熟，但祝福佢，希望大家都畀空間佢。
官恩娜：希望Isabella開心，當年大家都係同年新人，我一定支持佢。（小朋友無辜？）佢哋識處理。
