鄧特希食住上想拍Isabella自傳
Isabella高調宣布分手，這位富傳奇性的年輕女演員將何去何從？曾和她合拍《深海尋人》的資深電影製作人黃百鳴，大讚她雖是三子之母，仍大有巿場價值：「香港女演員好少，根本唔夠人用，佢退出前成績都好好，肯出番嚟一定冇問題。（佢已經係三個孩子嘅媽咪喎？）冇問題，栢芝都結咗婚，生咗ＢＢ啦！最緊要睇角色同故事。（你有冇興趣將佢嘅故事拍成電影？）咁又冇喎！」
至於和Isabella在電影《伊莎貝拉》演兩父女的杜汶澤則說與她久沒聯絡，不會再為別人的事作回應。而與梁洛施合拍《虫不知》的導演羅志良直言大家不熟，對事件沒有感覺，至於會否替她可惜一段感情告終？羅志良說：「人哋私人事唔想多作評論。」
至於劉偉強導演則坦言暫時沒有興趣將梁之經歷搬上大銀幕，亦未有找她拍戲的念頭，笑說：「我有三十億就唔出嚟啦，人係好現實嘅。」
亞視製作人鄧特希則揚言想開拍Isabella自傳式劇集，至於女主角人選，他說：「佢氣質好特別，本地冇人做到，真係揀惟有向外求，妮妲莉寶文！（點解唔搵佢本人演繹？）聽聞佢身家豐厚，仲點會演電視？係都進軍荷里活啦。」他又指對方年紀輕，復出後還有很大的發揮空間。
