荷里活型男索女夫婦奧蘭度布林同Miranda Kerr的囝囝才出世七周，但兩人常帶着他四圍去，日前奧蘭度被影到貪過癮拎囝囝奶嘴狂吮，完全無衛生常識，而初為人母個多月的Miranda則已極速回復身材。
當日奧蘭度夫婦被狗仔隊影到帶着囝囝Flynn在洛杉磯shopping，奧蘭度單手抱仔，另一隻手就拿外套、奶嘴、電話及車匙，可能太忙亂關係，他索性用口叼住奶嘴，似乎未有顧及衞生，相反產後成功收身穿低胸衫的Miranda就輕鬆地拿着咖啡去買花，最後Miranda跟Flynn坐私家車返家，奧蘭度就駕電單車離去。
另外，最近「老來得子」的艾頓莊在日前和「老公」大衞芬尼斯及兩個月大的囝囝Zachary去夏威夷度假。艾頓熟手地用雙手緊抱兒子之餘，更做鬼臉來逗囝囝開心。有目擊者指艾頓好開心騷兒子給人睇，又不時同囝囝合照。
而去年做過「明燈」預測奧斯卡賽果的艾頓，對今屆奧斯卡最佳女主角同樣有心水，他表示妮妲莉寶文會憑《黑天鵝》獲影后，但不一定贏梗。因對手安納貝寧曾在奧斯卡得獎，所以是評審最愛分分鐘跑出。但其實安納只是提名過幾次奧斯卡卻從未獲獎。除了艾頓看好妮妲莉外，早前被指有預知能力的德國負鼠Heidi亦預測奧斯卡影后是妮妲莉。
文：外娛組