情人眼裏重心思

唔夠廿四小時就到情人節,蜜運中的人當然為了炮製驚喜給情人而費盡心思。問到最難忘的情人節?婚姻生活美滿的「宇宙最強」甄子丹及丁子高異口同聲地揚言:「好多架喎!」其實只要願意為對方花心思,每天都是情人節!

活動:電影首映
熊黛林

其實我好少過情人節,我覺得兩個人喺屋企食餐飯已經好好。(想收咩禮物?)乜都得,最緊要係心意,同埋係佢親自揀嘅。而我曾經送過自己織嘅溫暖牌頸巾。

諸葛梓岐

試過有一年情人節,返到屋企打開房門,見到有好多氦氣球喺度飄飄吓,其中一個仲掛住咗份禮物,真係好開心,多謝佢咁有心思。

甄子丹與汪詩詩

詩詩:上年去台灣旅行,子丹叫酒店幫我哋訂咗全台灣最靚風景嘅餐廳。不過因為間酒店好大,我哋喺個mall裏面行咗40分鐘都搵唔到路,仲要畀狗仔隊跟住,最後要打電話去酒店求救,搵人嚟接我哋。

子丹:上年我生日,詩詩呃我話接咗工作,原來佢瞞住我幫我搞咗個二百幾人嘅派對!

李曼筠

04年情人節同男友去銅鑼灣食飯,本來好開心,但係佢突然鬆開我隻手走咗,嗰下我呆咗,企喺街度係咁喊,直至佢打嚟叫我去金紫荊廣場,去到見到地下有個士多啤梨cusion、一支橙色嘅玫瑰花同埋一張卡,之後佢先喺我身後出現!佢其實係想畀個驚喜我,不過真係好驚!

江欣燕

啱啱拍拖嗰陣,要求男友訂枱食燭光晚餐,點知去到畀周圍啲人認得,搞到成餐飯都烏低身食!又試過同男友去沙灘漫步,但因為怕畀人認得,所以好夜先去,點知去到因為潮漲,個沙灘得番少少!

汪圓圓

上年情人節同大年初一係同一日,有啲人要喺家人同男友之間選擇,不過我冇拍拖,同家人食飯都好開心,Daddy仲有送花畀我添!(想唔想拍拖?)如果搵啱都想,不過依家以工作為先。

活動:海港城活動Angelababy

最難忘細個嗰陣,同學喺我屋企一齊整朱古力餅,派畀全班同學食。(最難忘嘅禮物?)我自己好鍾意玫瑰花,試過喺情人節收過三百支,真係好靚,好開心!

丁子高

其實我覺得一齊食飯已經好開心,最Sweet係千嬅自己煮嘢食畀我食。我就試過包起間餐廳同佢食燭光晚餐,之後搵公司裝飾,自己就喺設計上畀意見。禮物方面,我自己鍾意親手整,獨一無二啲。