許冠文靠把口發姣氹o靚妹
香港棟篤笑鼻祖許冠文（Michael）再踏紅館舞台開騷，他笑言重出江湖全因「發老姣」，實則是為太太賀壽。雖然生日大晒，但他為了滿足觀眾，屆時會不留情面擺「o靚妹」太太上枱娛賓。
Michael將於本月十六日假紅館舉行一場《許冠文棟篤笑2最後警告》，近年養精蓄銳的他，相隔逾五年再上台搞笑，他笑言：「因為我發姣囉！但一定唔係為賺錢，因為當晚收益扣除必要開支後，就全數撥捐慈善機構，我一個仙都唔收。」
自嘲緋聞冇尷尬
今次Michael重出江湖，主要原因是十六日乃太太正日生日。他說：「送個騷畀老婆，氹吓我心目中嘅『o靚妹』開心。你睇我太太，幾十歲仲染成頭紅髮，打扮成個o靚妹咁。」不過屆時Michael會不留情面擺太太上枱搞笑，皆因太太是世上唯一不會嬲他的女人。其實受訪時，許太在他身旁，Michael擺明當老婆冇到。他又笑言會請弟弟許冠傑睇騷，但不會邀對方上台，皆因怕弟弟搶去自己風頭。
問到可會擺自己的緋聞上枱？Michael笑笑口說：「會，我都教學生千萬唔好避（是非），正如人哋話許冠文生痔瘡，我出嚟話唔係，啲人更加覺得我係，所以呢啲嘢我會處之泰然，一笑置之。」他又明白香港人八卦心理，正如何鴻燊分家產，傳媒每日都詳細報道。
年屆六十八歲的Michael絕不擔心被指out，他自信地說：「許冠文不知幾in呀！我咁嘅年紀仲可以喺紅館同過萬觀眾講笑，仲有人肯畀錢睇我，不知幾犀利！我希望好似六叔（邵逸夫）咁做到一百零三歲。」
唔換衫唔扮女人
對於近年狂吹「棟篤笑風」，後輩黃子華、王祖藍、林海峰等相繼上台搞笑，Michael大讚是好事，亦有計劃開班授徒。問到最睇好哪位後輩？Michael獨讚黃子華：「我同子華一樣，死都唔肯換衫，唔會有舞台道具，唔會扮女人，又唔會打功夫，搞到千軍萬馬咁，全程企棟棟靠把口，咁先叫犀利嘛！」
文：音樂組