子丹：滿意成績 百鳴：全球我贏
經過四日農曆新年假期，曾志偉的《我愛HK開心萬歲》票房暫時領先，而黃百鳴的《最強囍事》僅次排第二，甄子丹對票房成績感到滿意，黃百鳴則指若計全球票房，《最》片必定超逾《我》片多多聲。
根據香港戲院商會提供的資料（見附表），經過四日農曆公眾假期（2月3日至2月6日），由曾志偉掛帥的《我愛HK開心萬歲》暫時領先，收10,453,054港元，黃百鳴監製的《最強囍事》收8,558,694港元排第二位，周杰倫主演的《青蜂俠》收6,679,176港元排第三，第四位則是《魔髮奇緣》收5,859,377港元，《神奇俠侶》排第六收421萬港元。而新年檔期票房總收入達46,682,191元，較去年同期上升8個巴仙。
身家贈老婆
《最》片昨晚舉行慶功宴筵開廿六圍，現場大玩抽獎搞氣氛。雖然《最》片暫時未能稱冠，但有份主演的甄子丹坦言滿意票房成績。他又稱情人節將返港與太太共度，揚言將身家畀晒老婆。他說：「兩公婆冇所謂，我理財冇佢咁叻。」而古天樂在戲中的乸型角色維肖維妙，笑言被親友要求他扮乸型和為人客化妝：「有部戲仲搵我做女人，依家都要睇檔期。」杜汶澤則笑言在戲中向熊黛林露股，覺得對不起郭富城。
拒裸跑慶祝
對於《最》片票房暫時屈居第二，黃百鳴說：「《我》片有強勁宣傳平台，上映戲院比我哋多，無可厚非，同埋佢哋做街坊生意。情人節就到，我哋會吸引情侶觀眾入場，有信心反超前。電影喺內地上八日過億，希望有兩億票房，而馬來西亞收約600萬港元，新加坡收36萬坡幣。全球計我贏曾志偉o架！（會唔會裸跑？）佢自己裸啦！」另外，曾志偉亦從內地趕返香港，出席今晚《我》片的新春團拜。
文：影視組