William絕殺桃花陣 阿Sa暗示想嫁
陳偉霆（William）去年奪得蔡卓妍（阿Sa）芳心，大行桃花運，原來全靠陳母發功暗助囝囝奪Sa成功；而阿Sa亦大晒幸福，在拍照時特意將裙擺放在頭上當頭紗，十足待嫁新娘。
William事業、愛情兩得意，對於被指桃花運強，他哈哈笑說：「幾啦，我都鍾意有桃花運，代表有姻緣外，亦代表有人緣，做歌手多人鍾意絕對係好事。」
William指今年良緣到，全靠母親的無心插柳，原來陳媽去年買了一大棵桃花放在客廳增添新年氣氛，他說：「真係好大棵o架，（係咪成日圍住棵桃花兜圈？）唔係刻意，不過擺桃花個位，係我必經過嘅地方，我行咗成個農曆新年o架。」
情人節歌頌愛
阿Sa將和William共度首個情人節，為迎這個「大日子」，阿Sa將於周四推出情人節single《Sweetest Day》CD+DVD，和歌迷齊齊歌頌愛。拍攝唱片封套和新歌《年年》MV時，和William愛到發燒的她，無懼寒冷天氣，僅穿上露出白滑香肩、小蠻腰的tube top和單薄的連身裙上陣，連躺在冰冷的地板上也不覺凍。
她更發揮其D.I.Y.時裝觸覺，隨手將白色傘裙放上頭頂作頭紗，配襯埋身上的白色連身裙，甚有新婚feel，她表示：「簡簡單單已經好靚，好似碟名咁，無論情人、家人或朋友，只要對方做咗一啲令你甜在心嘅事，都已經係自訂嘅《Sweetest Day》。」
愛到死更淒美
另外，阿Sa在MV中扮鬼，和高大型男拍攝額頭貼額頭和從後擁抱的親密鏡頭，自認百無禁忌的她表示：「離開咗呢個世界，但仍然深愛住對方，『人鬼情未了』都係一種浪漫嘅愛情，感覺仲更加淒美添。」阿Sa開口埋口都離不開談情。
採訪：音樂組 場地：apm