Kelly蝦餃仔利是私有化
「潮媽」陳慧琳（Kelly）上月宣布懷孖胎，適逢新正頭，Kelly特別抱住一對孖兔向大家拜年，見她身形明顯發福、腹部微隆，福氣爆晒燈的Kelly祝願小朋友都健康快樂成長。
Kelly上月透過人工受孕成功懷有孖胎，準備今年將迎接一對兔BB，心情格外興奮，趁住農曆新年特別準備揮春及孖兔毛公仔向大家拜年，望住兩隻一模一樣的兔仔，她對腹中孖寶都非常期待，相中見Kelly略為發福，面頰都長肉，鬆身格仔衫都難掩腹部微微隆起，Kelly說：「依家做媽咪，真係感受到小朋友身體健康好重要，蝦餃仔唔舒服嗰陣，真係擔心都瞓唔到覺，我情願病嗰個係我自己！」Kelly希望兩個BB同埋蝦餃仔新一年都健健康康、開開心心，就夠令她心滿意足！
儲利是錢送驚喜
Kelly表示預了六位數字封利是派畀親戚朋友、公司同事等等，而她亦有跟老公Alex帶埋蝦餃仔去長輩屋企拜年拿利是，Kelly說：「我會將蝦餃仔啲利是錢儲起，等佢成年後一次過畀番晒佢，又或者供一啲教育基金，不過自己啲利是錢就會捐去『陳慧琳兒童助學基金』，希望幫助到更多有需要嘅小朋友。」
讀書要盡力而為
Kelly表示希望小朋友長大後搵到自己的興趣，讀書不是求分數，最緊要盡力而為，她說：「每個人才能都唔一樣，可能有啲畫畫叻啲、有啲運動叻啲，一班幾十人，唔會個個都考第一呀嘛，我唔想畀小朋友太大壓力！」
採訪：音樂組