千嬅趕生B 樂仔贈百發百中

繼去年《志明與春嬌》叫好叫座，今年千嬅跟阿樂會再合作新戲，阿樂知道千嬅求子心切，即寫上「百發百中」送贈千嬅，逗得千嬅狂笑說：「你估我老公係槍王之王？」

唔跳即有喜

今個新年對千嬅夠晒特別，因為大年初一正是她37歲生日，她笑說：「情人節就係我舊曆生日，第一次咁喜慶，初一唔使派利是，仲叫人畀番利是我。」千嬅生日願望是身體健康，因為她希望為老公趕製兔B，她續說：「我都問丁生乜事咁趕？佢成日對記者講恨生仔，搞到我好大壓力，佢係傳統男人，啲人仲話佢係playboy，佢play唔到，陰波功就叻。」

千嬅身邊好多朋友生B，令她開始感到興奮，但生仔要順天意，她說：「當然早好過遲，我都想生兔B。」千嬅不會刻意隱瞞有喜，她說：「冇得呃，老人家覺得講得先講，（暗示？）我跳囉，唔跳得就係，哈哈。」

娶妻為生仔

單身的阿樂獲千嬅回贈「天降美女」四字，他笑說：「我都想盡快搞掂，唔想太老先生B。」外表新潮的他內裏保守，拒絕閃電結婚或奉子成婚，他還大爆媽咪的激將毒招：「佢成日話唔好生囉，一個人終老，老來冇人照顧，好毒架。」他揚言要努力搵銀，結婚一生希望一次，不想太寒酸，他更抵死公開擇偶條件：「都冇乜要求，唔係男人識生就得啦。」

丁子高昨日出席活動時，被問到是否努力造兔B？他笑言：「依家努力中，希望喺農曆三月前成事，因為兔B旺屋企。有相士話我今年好大機會有BB。（有冇日日進補？）其實我同千嬅都有睇中醫，想調理好身子。」大年初一是千嬅生日，他表示年三十晚為千嬅籌備了一個驚喜派對。他又透露年初一、二、三都在家同朋友玩魚蝦蟹，企足十個鐘頭莊。（咁咪冇時間造人？）新年都要放吓假。」

文：音樂組