送苦迎兔沾旺氣 李曼筠拋胸谷桃花
兔年來臨，自言虎年「苦過Dee Dee」的李曼筠變身性感兔女郎，又黐真兔仔沾旺氣，希望新一年密密開工兼有拖拍，一於「送苦迎兔」！
李曼筠（Maggie）去年傷痕纍纍，多次不慎弄傷身體，更惹來遭虐打疑雲，她說：「舊年我年初一踩玻璃，之後又(界)親又畀貓抓……好多地方都有傷痕，好黑！希望新一年健健康康，大家都要愛錫自己多啲！」為沾旺氣，Maggie變身兔女郎「送苦迎兔」，大擺性感甫士趕衰運，並與真兔仔打成一片。她甫見到兔仔即興奮莫名，除了餵食物又將牠抱來抱去，兔仔亦樂於躺在Maggie的懷抱中：「隻兔仔好得意，啲毛好軟熟，不過好似幾細膽！（打算養兔仔？）有計劃過，但我有三隻貓，驚佢哋會蝦佢，惟有買兔公仔啦！」
三餐狂食蘿蔔糕
為食的Maggie提起賀年食品即舔舔脷，猶記得小時候試過一日三餐狂食蘿蔔糕：「媽咪整得好好食，我一個人食晒成底！（唔驚肥？）一年放縱一次，食得是福嘛！」提到新年大計，Maggie希望多拍電影電視劇及嘗試做主持，至於拍拖則隨緣：「緣分到嗰陣要擋都擋唔住！我都會買桃花，旺吓人緣！」
今年Maggie有份參與眾星雲集的賀歲片《最強囍事》，令她非常興奮：「我睇晒咁多套囍事系列，所以有份加入好難忘，係最好嘅新年禮物！我最鍾意張曼玉個角色何里玉，睇幾多次都咁好笑！」
採訪：立影
攝影：黎志輝
服裝：Blossom
場地：Your Home Cafe