君如封利是重手 古天樂唔敢收
吳君如與古天樂大筆一揮，祝賀大家新年快樂。君如這個新年化身財神，見人就派利是，竟然嚇得古仔「唔敢接」，二人更忽萌奇想，想將主演電影改編為動畫再撈一筆。
君如與古仔「夫妻同心」寫揮春，年紀輕輕的君如女兒陳是知則從旁打氣。席間古仔大爆拍檔豪氣之舉：「我同佢去宣傳，忽然見到佢喺度包利是，仲超大封添，點知佢隨手攞起一封畀我，咁大封我梗係唔敢要啦。」君如接戲冇停手，派大利是自然可以理解，她說：「手頭上有幾多盡量都封晒去，大家開心啫！」
過年前東奔西走，君如為爭取陪伴家人，已決定飛往澳洲度假一星期：「有個朋友借咗個牧場畀我哋住，咪同囡囡過去揸吓牛奶同睇吓袋鼠囉。」
搞動畫賺多筆
君如與古仔出名孝順，明天大年初三剛巧是吳媽媽生日，君如不但送上豪華旅行團祝壽，屆時更會「折現」當禮物。至於古仔每年都會向雙親跪地斟茶拜年，並留家負責拜祖先。談到新年願望，二人都希望有份參演的賀歲片能大收旺場，君如笑謂：「其實好似《神奇俠侶》一早留咗伏線可以開續集，收得最好改編埋做卡通片，嚟一套《神奇俠侶大戰喜羊羊啦》﹗」
文：影視組 攝：李廣成