林峯整蠱子珊鬥氣生財

阿峯、卓羲與子珊均為無綫小生花旦，由於年紀相若，甫一聚首即玩個不亦樂乎，同齡的阿峯與卓羲相當百厭，經常夾手夾腳整蠱子珊，卓羲一見「大頭佛」道具，即笑指激似「豬女」，令曾於電影演繹「豬女」一角的子珊忍不住笑罵，不過卓羲還未罷休，還作狀把「豬女」道具放在子珊頭上，令處於下風的子珊只懂不斷傻笑，毫無反擊之力，認真慘情。

另邊廂的阿峯則拿起獅頭，一臉帥氣高舉並大擺甫士拍攝，子珊則從旁配合作打鼓狀，不過獅頭有一定重量，阿峯雙手愈垂愈低，後來更索性把獅頭放於子珊膊頭上，子珊即呱呱大叫，此時卓羲未有幫拖之餘，還拿來巨型揮春擺騎呢甫士搶鏡，惹笑非常，三人不時你一言我一語互窒，言談間充斥着歡樂笑聲。

今年加倍努力

談到新年願望，身為大師兄的阿峯表示望兔年一切順利，問到是否去年受負面新聞纏繞才有感而發？他謂：「都唔係嘅，咁喺呢個圈都超過10年，唔會全世界人都鍾意你，所以唯一就係要做好自己，咁先對得住賞識你嘅人，其他嘢我控制唔到。（心情低落過？）有，不過聽日又係新嘅一日，做人唔應該回望，所以今年要比舊年更努力！」

林峯定下兔年目標，不受過往的負面新聞影響。

吳卓羲經常開子珊玩笑，將「豬女」道具放在她頭上。

「三兄弟」融洽

卓羲則笑指希望今年能繼續進軍內地，被取笑30出頭也不談戀愛，他謂：「等緊，10年前20幾歲就話唔憂啫！不過阿媽都冇催，其實我屋企年年都有擺桃花。（要求太高？）自己條件唔高，又點會要求高呢，不過我唔會一見鍾情，要相處耐啲嘅。」至於亦是單身一族的子珊，笑言今年望重返歌壇，問到與兩師兄合作無間，感情有否昇華？子珊謂：「對到嘔啦！呢排Keep住做阿峯演唱會Tour，雖然有畀佢兩個整蠱，不過大家好融洽，因為都冇當我係女仔，我哋係三兄弟先啱。」

採訪：影視組　攝影：秦健輝

服裝：中藝

鳴謝：夏國璋龍獅團