六叔領軍團拜高層護駕
邵逸夫（六叔）一手湊大的無綫早前正式宣布易主，六叔昨以主席身份出席大年初一節目，親向觀眾拜年。而六叔昨日相當精神，並於眾高層和保安重重護駕下現身。
六叔昨日早上十一時四十五分精神奕奕由太太方逸華（六嬸）陪伴出席年初一直播節目，其福祉車直駛入一廠，並由總經理陳志雲推入前排就座，同行還有董事利孝和夫人、副行政主席梁乃鵬及港姐陳庭欣、張秀文，數百現場觀眾及無綫行政人員見到六叔出現都拍掌致意，六叔亦精靈揮手打招呼。期間有記者問六嬸明年還來不來？但她未有回應，再問何時有新成員（意指殼王陳國強）？旁邊的董事總經理李寶安代答：「團拜梗係一齊啦。」
醒獅失平衡跌下
節目開始時播映六叔預先錄好的片段，向香港市民拜年，主持按獅頭儀式後有醒獅表演，可惜當司儀吳家樂講到無綫「步步高陞」時，一隻獅子在樁上失平衡跌下來，認真大吉利是！節目尾段由胡楓扮的財神向六叔派利是，阿姐汪明荃也上前向六叔攞利是，而今年無綫開工利是增至二十大元，相比去年的「小太陽」二元硬幣，大幅調升十倍！
事後記者欲訪問六叔，但在保安、高層重重保護下，雖聽到記者問他「賣盤捨唔捨得」，只望住記者未有表示，被問到「明年嚟唔嚟」？六叔則口噏噏，可惜太細聲未能聽到，而其他高層亦很快離開，其中陳志雲趕往機場離港度歲。能貼身跟六叔拜年的阿姐開心的說：「方小姐畀咗封利是我，話係六叔畀我嘅。（唔捨得六叔？）唔會，始終佢年紀大，佢嘅選擇係最好嘅選擇，佢咁珍貴嘅事業，應該信佢。」
馬浚偉被催婚
此外，不少藝人亦大派開工利是，阿姐封二十元加肖像年曆卡，梅小惠二十元加六十元美食現金券，麥玲玲一百元，王祖藍與女友李亞男均二十元。而封五十元的馬浚偉表示被女友父母催婚，但他認為未是合適時候，並鎖定目標做視帝。
文：影視組
攝：林蔚恩