JJ埃及噩耗只見坦克槍手

JJ前日成功離開埃及飛抵北京，昨晚約８時許終於平安返港。見到記者時仍驚魂未定，表情緊張說：「28日到達開羅，食午飯時聽到開始亂，成團人趕去火車站，途中見到好多人，有人燒車，好亂，好在嗰刻已衝入火車站，之後已經唔畀人入。」

有半團人滯留

JJ謂之後搭火車去紅海，已聽聞開羅亂得好緊要，她眼紅口震說：「好在離開咗，不過中國領事館人話喺紅海冇包機，要我哋返開羅，結果搭咗７小時巴士去開羅，見到無數坦克車同軍人，最驚只係見到揸槍嘅人，唔見有市民。」問有冇見到血腥畫面？她說：「有車燒着，好多人圍住，驚自己坐架車撞到人。」

終於在１日當日抵達開羅機場，但卻有幾千人在等坐包機，JJ說：「我哋差唔多等咗全日，因為包機畀老人家同小孩上機先，而自己同父母一起，才可以先一批離開。」前日JJ一家三口終平安飛抵北京，但仍有一半團友滯留埃及。被困埃及５日的JJ，每晚都冇覺好睡：「唔知幾時走得，昨日返到北京終於有覺好瞓。」

雖然已離開險地，但JJ仍驚魂未定：「真係好驚，全程唔知發生乜事，只係見到槍同坦克車，唔知下一步去邊，好在有包機。」問是否驚好似菲律賓事件翻版？她說：「好在各方及時派飛機去當地。（有冇安慰父母？）父母安慰番我，自己本來想同佢哋開開心心去旅行，點知累咗佢哋，真係好內疚。」

冇買旅遊保險

至於旅行社有冇賠償？JJ沒想此事，但自己卻冇買旅遊保，問敢唔敢再去埃及？她說：「好想去，當地真係好靚，市民又好好。」前晚JJ在微博上載了一張在金字塔拍照留念的相，留言：「奔波了很久真的好累呀！大家要開開心心過年呀！我要休息了。」

而樂壇新人朱紫嬈本計劃年初三跟家人和朋友包團去埃及玩：「機票同酒店都畀咗一半訂，點知政局動盪，為安全計都係取消。」

採訪：音樂組