回復單身鬆口氣 阿Sa上人生寶貴一課
歌手蔡卓妍（阿Sa）跟前夫正式辦理離婚手續，回復單身的她坦言鬆一口氣，今次可謂上了人生寶貴的一課，提到贍養費安排，阿Sa說：「不嬲都冇提過呢樣嘢！」
阿Sa昨日出席海港城主辦的朱古力展覽活動，提到日前跟前夫正式辦理離婚手續，回復單身的她會否鬆一口氣？阿Sa說：「你都可以咁講嘅，其實大家做呢個決定嗰陣開始已經輕鬆咗，始終大家仲係朋友。（微博留言講到好似唔稀罕佢啲贍養費？）只係睇咗一啲報道，覺得唔認同大家價值觀，有感而發啫！」阿Sa表示無意慶祝回復單身，但認為今次上了人生寶貴的一課，問到贍養費的安排？阿Sa說：「不嬲都冇提過呢樣嘢！」
上William家拜年
提到今年情人節，阿Sa透露當日將推出全新Single碟，又撞正公司春茗，相信無乜機會跟男友陳偉霆（William）慶祝，連原本想出埠旅行的念頭都可能要打消，她說：「本身諗住去遠啲嘅地方旅行，點知機位好爆好難book，（同William去？）唔話你知！」阿Sa表示工作太忙，無暇跟家人食團年飯，但相信會跟隨傳統習俗上William屋企拜年。
活動後，阿Sa在微博上載與現場的混血三姊妹合照，其中兩個更是twins，她大讚孖妹漂亮可愛，更自爆母性又開始氾濫中。
文：音樂組