周秀娜反擊Carol百無禁忌
經常被「浸大E神」楊梓瑤（Carol）咬住唔放的周秀娜，昨日就前輩論作回敬，揚言自己仲生勾勾無咁易死，並祝Carol唔好咁快老及咁快死，即使年近歲晚，周秀娜仍然百無禁忌，認真得。
昨日周秀娜偕模特兒男友Avis（陳偉成）首度以情侶姿態搵銀，為PONY 2011全新系列行騷，首次情侶檔行騷，酬勞足夠享受一個泰國豪華團，又可以公然晒恩愛，一舉兩得，人財兩得的她，回應Carol的前輩論，特別風騷，且百無禁忌，她說：「多謝各位，我日日當自己係後輩，無諗過出道兩年已經係前輩，人總要經歷生老病死，佢口中我經歷咗老，惟有等死啦，哈哈，講笑啫。」續說：「佢都會經歷，遲早都會老同死，希望佢唔好咁快，都係講笑，希望新一年大家長做長有。」
男友齊夾擊
對於Carol指兩人並非真正朋友，周秀娜大方表示兩人其實是有偈傾，亦否認對方經常向她「抽水」作自我宣傳，又再度開玩笑地說：「我仲生勾勾喺度，提我好正常，我冇咁易死。」身邊的男友原本默不作聲，此時亦忍不住和應女友說：「係，佢（周秀娜）冇咁易死。」實行「夫唱婦隨」，一唱一和。
是次品牌與由雷頌德主理的COOLDAY,SIR合作，雷頌德昨亦有撐場，提到好友陳慧琳（Kelly）懷孖胎，即將成為三子女之母，由於他亦育有三子，指Kelly已追上來，讚對方犀利，他說如果Kelly是生女，一定是靚女一名。
文：名人組