娛樂圈好多藝人口口聲聲話最怕傳緋聞，其實問心嗰句，好多藝人都明白緋聞增加知名度，同收入直接掛鈎。像內地女模徐靖雯，過往寂寂無聞，出活動都係幾千蚊出一次Job。自從同鄭嘉穎傳出緋聞後，身價即升要求開高一倍有多的酬勞，認真識搵真銀。不過世界好現實嘅，自從嘉穎開腔同佢劃清界線，佢嘅身價立即回落，打回原形。
不過同蔡依林（Jolin）傳緋聞嘅男模錦榮就唔同嘞，以前佢喺香港做model都係收幾千蚊一個活動，佢去台灣發展之後，近期仲同Jolin傳出緋聞，有廣告商請佢返香港出騷，錦榮即刻獅子開大口開高出十倍價錢，仲要包商務來回機票同埋經理人、髮型化妝師嘅旅費，真係今時唔同往日！所以話呢，可能有藝人唔鍾意緋聞，但唔排除有人鍾意囉！