吳君如床戰古仔慌失失
吳君如在新片中與古天樂有床上戲，被爆兩人排戲時，擔任監製的另一半陳可辛專程探班，君如即心慌慌，惟對此事君如予以否認，還笑言費盡唇舌叫老公走也不肯離開，加上對她又苛求，直言日後盡可能不再合作！
電影《神奇俠侶》前晚舉行慈善首映，除了主角君如、古仔及監製陳可辛外，曾華倩、商天娥亦到場撐老友君如，抱恙上陣的君如以低胸裙騷胸前事業線，聲言不遺餘力支持另一半：「我直情冒生命危險攞（咪咪）出嚟。」君如更游說古仔若然票房好便裸泳慶祝，古仔聞言即笑謂：「我攞錢出嚟派利是啦！」
兩公婆唔再合作
導演谷德昭大爆君如與古仔有場床戲，她甫見陳可辛來探班即顯得慌失失，君如說：「拍佢嘅戲冇公私分明，親疏有別，慌失失同床戲冇關係，佢對我好苛求，行開行埋一句潤我，喺屋企又會話宣傳唔夠，要做多啲。（唔再合作？）盡可能唔合作，好混淆、好攰，又知幕後嘢會惹嚟殺身之禍，搞出人命，我同古仔排床上戲，佢又唔肯走，叫佢快啲返去瞓，咁老仲成頭白髮都唔肯走！」在旁的古仔則說未感尷尬。
華倩抽水摸古仔
期間，華倩一見型男古仔，即以9秒9姿態衝來，與君如齊齊又摸又讚，場面惹笑，貪玩的君如更力sell古仔給華倩：「佢有啲地方好大，我係話間屋。」令華倩笑到見牙唔見眼說：「細過我就唔會考慮，不過你就考慮吓，因為你有少少怕醜，好冧女仔。」唔抵得的君如聞言即揶揄她：「係呀，我好多中女朋友都好鍾意古仔。」
與無綫簽有部頭約的華倩，對陳國強入股TVB當新老闆，與對方認識的她大讚陳為人隨和，希望以對方多年資歷能幫到公司：「大啲自由度，製作更好節目，最重要拎多啲好嘢出嚟，唔好又裁員。咁六叔同方小姐畀人感覺親切，都唔捨得，可能佢哋想享受人生啦！」
文：影視組