楊秀惠犧牲色相求突破

楊秀惠在新劇《仁心解碼》中飾演一名癡肥女子，拍攝前要花上四、五小時化妝，令她渾身不自在，她說：「件膠衫着得耐會好焗，每次拍完激動鏡頭，成個人覺得好暈，有虛脫感覺，加上塊面要搽好多膠水黏住個假面具，搞到好難食嘢，連飲水都要用飲管。落妝又要兩、三個人幫我，最慘係啲膠水令皮膚敏感，搞到起晒粒粒。」

曾經發脾氣

拍攝過程雖然好辛苦，但秀惠卻體現團隊精神，她說：「全體工作人員都對我特別照顧，擔心我負荷唔到，會安排充足時間畀我休息。咁耐以嚟我試過一次發脾氣，但大家仍好體諒，尤其是拍檔黃浩然好有耐性，從來唔會話趕收工。」

楊秀惠在拍劇期間曾發過一次脾氣，幸拍檔及一班工作人員十分體諒。

放大圖片

怕觀眾反感

湯盈盈曾憑着「阿好」的醜女角色突圍，不過秀惠自言未想過得到甚麼獎項，只希望能挑戰自己，她說：「講真，當初接呢部劇冇諗過咁辛苦，只係覺得角色好得意，真係冇諗過攞唔攞獎。」由於角色太突出，秀惠還擔心過觀眾會接受不來，她說：「好多人話唔認得我，起初都驚有人會反感，好彩出嚟亦好接受。以前嘅我無論廣東話同做戲都唔係太好，希望今次會令觀眾改觀，因為今次唔係以楊秀惠身份去演，而係從一個演員角度畀大家重新認識我。」

文：專案組

髮型：Vanness Leung @ Hair Conrner 服裝：BOSS ORANGE