趙碩之爆瘡情人節柄埋
趙碩之、戴夢夢及陳若嵐（Melody）等趁新春佳節舉行BBQ聚會，碩之Big贏Melody成功餵老闆林建名食肉丸，她又自爆每年狂擦熱氣的賀年食品，結果爆晒瘡，情人節都要「柄」埋。
戴夢夢、趙碩之及Melody趁新年將至，率領一眾師弟妹舉行BBQ派對，現場見新人鍾一憲、麥貝夷（Karene）、劉振宇（Water）及羅梓螢均十分興奮，不時滿場飛篤嘢食！碩之與Melody更出招燒肉丸及香腸餵老闆，林生似乎對碩之的肉丸較有興趣，身旁的Melody當堂扁晒嘴，林生見狀即左一啖右一啖以證冇偏心！
靠桃花搵姻緣
提到新年願望，碩之及Melody均表示想行桃花運，更高呼要求偶！Melody急着說：「身邊啲同學都唔係好啱我，思想唔夠成熟，（冇人追咩？）冇呀！可能我唔出聲好似好靜好惡咁，你哋有冇男仔介紹？」碩之則說：「我都想拍拖，不過又唔會刻意，如果桃花係指人緣都好吖。」她又指每年都因狂食賀年食品，摧毀其後的情人節：「我會狂食角仔同煎堆，跟住就會熱氣到爆瘡，之後嘅情人節就會冇晒Mood，唔想出街！」
林生派大利是
大師姐夢夢表示想大家有更多活動空間，故不選擇傳統中餐賀年：「我哋個天台好大好靚，所以想BBQ，等大家活動吓，感情都好啲！」老闆林建名亦大讚有創意，問到是否已準備大利是派發，他則大賣關子：「數目未定！總之一定唔小！」夢夢表示其公司不乏聚會，下月又有開年飯，問到新一年的發展大計，她說：「今年我哋公司重組，會成立唱片部門，所以旗下藝人都各有表現機會！」問到會否向其他公司挖角？林生即說：「我哋會自己栽培新星，唔會挖角！」
文：立影 攝：司徒國榮
服裝：Florucci、Stop配帽站