RB互揭瘡疤band房着火
RubberBand（RB）四位成員情同手足，不過相對多自然摩擦難免，阿正被爆曾發脾氣突離場，而泥鯭則反被指摘「no show」總綵排，互揭瘡疤令band房火藥味十足，好在做兄弟冇隔夜仇，鬥完氣又開開心心去夾band。
RubberBand四位成員6號、泥鯭、阿正及阿偉，因音樂結緣，由好友再組成樂隊進軍樂壇。談及日對夜對七年，他們可有拗撬？泥鯭及阿偉即暗寸阿正：「有啲人成日請假囉，有次有人發脾氣走咗去囉。」阿正澄清不是無故發脾氣，只是不滿有人綵排時「玩玩吓」，他續反爆泥鯭的惡行比他更嚴重：「有次音樂會總綵排，泥鯭『no show』添，但佢又唔係有事，原來有人發脾氣，匿喺屋企，專登唔出嚟做綵排添。」
買清新機先斬後奏
除發脾氣鬥「出走」外，泥鯭和阿偉聯手寸阿正「先斬後奏」，在未經他們同意下，私自買空氣清新機回尖沙咀的Band房，泥鯭寸嘴說：「仲要買成萬幾蚊一部空氣清新機，又唔問吓人哋意見。」阿偉附和說：「買番嚟都冇問題，但最大問題係要夾錢，成萬幾蚊，好貴，我哋Band房租金，每人每個月都係千幾蚊之嘛，依家每人要夾成二、三千蚊，（好不滿？）唔係，不過唔畀錢之嘛，拖住先。」
被「圍剿」的阿正則解釋：「因為Band房細嘛，空氣唔流通，同埋我發覺Band房有臭味，我買嗰部空氣清新機可以隔咗啲臭氣，貴得有道理。」
6號變身正義超人
問阿正可曾嬲泥鯭及阿偉？阿正表示從沒嬲過，但如對方爆粗就「反面」，至於甚少插嘴的主音6號幫阿正說公道話：「阿正請假，其實佢自己最辛苦，因為佢要喺假期前做晒所有嘢。」
採訪：音樂組