林峯嘆dry怕擺桃花陣
林峯公開表示羨慕李亞男與王祖藍「日日都係情人節」，坦言自己dry爆恨拍拖，但相信愛情要靠緣分，更不會買桃花催旺姻緣。
人氣爆燈的林峯與蜜運中的李亞男應邀出席電器店開張活動，期間李亞男不忘晒幸福，表示和王祖藍「日日都係情人節」，並開始物色情人節禮物送贈對方，同場的林峯聞言大表羨慕：「好dry，都恨拍拖！不過我拍拖同屋企會好密切，所以女朋友一定要過屋企人嗰關，要同佢哋好夾，新年同情人節咁近，有女友互相拜年真係好Warm！」
林峯坦言需要愛情滋潤，但就不會靠桃花催旺，他說：「我係廈門人，新年唔興買桃花，會買桔、銀柳咁，（桃花旺喎？）順其自然啦，我人緣不嬲都幾好（但詹瑞文最近又寸你喎？）呢啲無傷大雅。」
李亞男等求婚
同場的李亞男坦言隨着戀情公開，今年情人節終可光明正大拍拖，回想以前要「靜雞雞戀愛」，她說：「都開心，但今年心情唔同。」更表示兩人媽媽在教會已認識，新年亦會到祖藍家拜年，至於兩家人會否趁機聚會，她說：「到時先算！」林峯又自爆曾和李亞男拍婚紗照，祝福她和祖藍早影真正結婚照，李亞男聞言笑說：「唔該晒佢，祖藍從來唔講呢啲，鍾意畀驚喜我，（會唔會趁情人節求婚？）哇！哇！哇！我未準備好喎，你哋畀啲壓力佢啦！」文：影視組