蔡少芬膽生毛恨試十級痛
身懷六甲的蔡少芬昨日以五吋高跟鞋及大露背裝到澳門出席剪綵活動，認真貪靚！Ada受訪時表示會在港生產，到時希望能自然分娩，她自言一向勇敢，好想親試十級陣痛。
【陳永峯澳門直擊】蔡少芬（Ada）昨日專程到澳門為護膚品牌專櫃主持剪綵儀式，雖然Ada身懷六甲，但看來狀態甚佳，她大膽穿上五吋高跟鞋配碎花露背裙亮相，相當貪靚。剪綵後Ada又照舉杯飲香檳，大會送上一籃護膚品及BB衫，令Ada笑逐顏開。懷孕後身材一樣苗條的Ada講到她的打扮，她笑說：「趁依家身形仲着到嘛！」
老公講性別
Ada對懷孕多久依然守口如瓶，問到懷中是男是女﹖她說：「已經照咗，但係都係等老公講，佢係一家之主嘛。」Ada表示會在港分娩以便家人照顧她，問到會否採取自然分娩，她說：「自己一向好勇敢，好想試吓十級陣痛，呢啲機會一生人可能只得一兩次，到時會要求老公陪產。」
蔡少芬近期忙於在大陸拍劇，二月尾要再到北京拍攝煞科戲，她說：「仲有一日戲要喺冰湖上拍，講我睇住其他妃子喺湖上溜冰。」
佗B易忟憎
對於有指Ada患了強直性脊椎炎，但因佗B而停藥，她說：「呢個病未結婚前已經有，唔痛就唔使食藥，佗住BB可能對衡番，令硬咗嘅骨拉鬆咗，到依家反而連一般大肚婆嘅腰痠背痛都冇。」另外，有指Ada因佗B失眠，她說：「我自己喺微博寫，係呢幾日有啲失眠啫。」Ada又指懷孕後容易忟憎，但未去到躁狂程度，情緒總算很快就能平復。