麥浚龍彈弓手氹掂鄧麗欣
麥浚龍（Juno）與鄧麗欣（Stephy）雖在緋聞關係表中連線，但無懼緋聞合作新片。二人在片場內初時表現陌生，但最終Juno主動出擊，以「包、剪、揼」融化了雙方的隔膜。
Juno與Stephy主演新片《小雙俠》（暫名）正式開拍，由於二人均在鍾欣桐和方力申的緋聞架構表出現，感情關係錯綜複雜，一直成為電影的焦點。現場所見，二人起初少有交談，表現生疏，及至拍攝中段Juno出擊打破沉寂，主動撩Stephy玩「包、剪、揼」，又故意彈弓手增加話題，逗得Stephy十分開心，火速打成一片。問到Juno與Stephy合作會否尷尬，他說：「選角係由導演、監製決定，我哋係有愛情線，我又唔介意大家揣測。（合作感覺如何？）新聞冇影響我哋。佢喺我印象中比較靜，要多啲溝通先做到導演要求我哋要有嘅嘢。」
孭溫超跑樓
同場Juno需要孭着負傷的溫超連跑幾層樓梯，來來回回跑了三、四次仍臉不改容，Juno說：「一向有做開運動都應付到嘅，不過套戲好多動作場面，對手都打到傷晒。」而臉部化了重傷妝的溫超，臉部長時間被假血漿蓋住，受到皮肉之苦，又要躺在地上捱打，他說：「我唔介意，最重要是演得好。」
文：影視組