佘詩曼仆甩臼新劇被飛
佘詩曼原本於大陸返港拍攝新劇，但不慎跌甩手臼，要打石膏兼休養六星期，令監製要臨時換女主角，認真頭痛。首次與阿佘合作的黎耀祥大嘆可惜：「估唔到第一次同佢合作就撻Q，係咪我剋親佢呢？」
本報收到消息，阿佘大前晚於杭州準備返港時，到機場遇大雪，落車時不慎被地上的冰跣倒，其左手手(月爭)先落地引致甩臼，要即時在當地醫院打石膏。阿佘回港後即時再求醫，拆了石膏再包過，不過由於休養需時，故被迫辭演劇集《法證先鋒Ⅲ》。
監製選新角頭痛
阿佘昨日接受電話訪問，她聲線柔弱謂：「我發現隻腳開始麻痹，醫生檢查過話壓住神經線，依家隻手好痛，條腰又唔可以保持一個姿勢太耐，所以尋晚都瞓得唔好。」雖然日常生活有很多不便之處，但慶幸佘媽媽在港照顧她。昨日阿佘已向監製梅小青、高層曾勵珍及樂易玲溝通，她說：「最唔開心係影響咗小青姐，令佢好麻煩，劇組已開廠，如果停廠等我會有困難，最後公司叫我休息養傷。今次係第一次拍祥仔，依家拍唔到真係可惜。」
監製梅小青承認急切找一位既好戲又是一線的演員頂替阿佘，她說：「依家處理緊，原本佢今日開工，依家影響梗係會有！不過阿佘好有演員道德，佢都話怕我哋唔知點算。（選角有乜心水？）都要一線啦！之前睇咗祥仔、徐子珊拍落嗰啲片，佢哋做得好好，都要搵個好戲啲嘅。」她強調最重要是阿佘身體健康：「就算要佢夾硬開工，佢個臼都好易甩，佢抖完六個星期都應該要做物理治療。」
祥仔要靚女拍檔
劇中與阿佘飾演情侶的祥仔聞得拍檔甩臼被「飛」新劇，他坦言「打個突」：「估唔到第一次同佢合作就撻Q，係咪我剋親佢呢？（想換邊個做你另一半？）真係唔知，好難講，依家個個埋晒班，我都幾戥監製頭痛。（搵番個好似阿佘咁靚？）梗係！最緊要靚女，我喺劇入面都係型男嚟o架！」同劇的徐子珊表示聽聞過阿佘受傷，她說：「最緊要係佢早日康復，我之前都未同佢合作過，本來打算向佢偷吓師，不過依家冇機會，好可惜。」
文：影視組