Kelly人工受孕懷龍鳳胎三個月

現年38歲的陳慧琳（Kelly），昨日包到冚出席活動，穿上三吋長Boots的她在表演期間還輕鬆上落斜路，殊不知她原來已懷有差不多三個月孖胎。在接受訪問時，Kelly向記者透露喜訊，她說：「有咗，仲要係兩個，孖嘅。（三個月？）差不多啦，總之夠日子可以講，未知仔定女。」

生埋呢胎「封爐」

向來傻大姐性格的Kelly，更大方承認為人工受孕：「係呀，選擇咗人工受孕，想40歲前生到，心急咗，依家38歲喇，都驚BB危險，人工同天然都有努力過，見唔係好得，所以醫生建議咗呢個方法，怕遲生體力唔夠好，風險都大，我個人唔貪心，其中一個係女就得喇！」而據本報可靠消息，Kelly腹中骨肉為龍鳳胎，認真喜上加喜。

突然「起孖」，Kelly亦坦承是計劃之外，她說：「失咗預算，屋企人開心到爆。（老公反應呢？）佢都嚇一嚇。（老爺佢哋唔使爭住湊啦？）都好，減輕我負擔。」已育有一子劉昇（蝦餃仔）的Kelly表示暫時未將做哥哥的消息向蝦餃仔報告，Kelly說：「佢都唔知我做乜，冇講，太細喇！（生埋呢胎收爐？）生到出嚟先啦，唔係收爐，係封爐添呀。」恨女恨到發燒的Kelly透露知道是孖胎時，心情又驚又喜，她說：「驚佗唔掂，見步行步啦，今次驚啲，上次個肚已經好大，大到好似爆開咁，今次兩個應該好巨，怕應付唔到。」

問到她會否停工迎接小生命？她說：「要睇吓個肚有幾大，如果大到唔想見人就唔出啦，唔係嘅話都會出嚟玩吓，喺屋企好悶架！」

陳慧琳夫婦心急再做父母，徵詢老人家意見後決定人工受孕。

陳慧琳早前（左）出席星皓電影《大鬧天宮》記者會時，已知懷有身孕。

事前問准老爺

Kelly表示出埠可免則免，亦盡量少搭飛機，提到Kelly早前到北京拍攝電影《大鬧天宮》，其實當時已知道懷有孖胎：「都係企喺度。（今日高踭幾吋呀？）三吋，矮咗架喇！」

據知自蝦餃仔出世後，Kelly調理身體準備三年抱兩，但未能成功，連老爺奶奶都不時被朋友追問，奶奶也坦認兒媳沒避孕，未有所出亦無可奈何。而Kelly採人工受孕方式前，尊重兩老先問意見，兩老思想開明，也信任一直幫Kelly的婦科聖手何永超醫生，對於Kelly懷孖胎，因事身在內地的老爺開心不已；至於Kelly父母同樣老懷安慰。

採訪：音樂組