呂方總結舊情坐監十六年

舊愛新歡

演唱會我都會請嘉賓，不過依家仲聯絡緊，仲未落實喎。問我會唔會請嘟嘟（舊愛鄭裕玲）做嘉賓？唔會囉，送飛畀佢都會，如果係真朋友，又想嚟睇，咪自己買飛啦，我啲演唱會飛一向都唔會派，唔需要送啦，送乜鬼呀﹗我都好耐冇同佢聯絡，唔需要啦，係咪再見不是朋友？我唔知喎，都咁耐冇見，唔好講啦，毋須要再講，都已成為過去啦。

三女對我有啲feel

我依家有冇拍拖？有呀，應該講係有女性朋友對我有意思，唔係一個，係三個對我「有啲感覺」，佢哋全部都係三十幾歲左右，專業人士囉，有香港、有大陸嘅，有乜好出奇啫（聲音高八度）？我唔可以有女仔追架？

我有咁多女性朋友，又唔覺得自己花心喎，做朋友之嘛，我都坐咗十六年「監」啦，依家重獲自由，就好似一隻雀仔咁，仲係一隻冇腳嘅雀仔咁周圍飛，仲唔周圍瞄咩？我覺得四十幾歲嘅單身男人好吃香架，我咁耐都未試過咁開心，可能你哋覺得我囂，我認架，我從未試過咁高傲，未試過「飛」得咁「行」，之後我會去大陸、美加做巡迴騷，我仲會瞄埋啲鬼妹添。

一定結婚

我又覺得多女性朋友，唔算係花花公子喎，我都冇認定對方係女朋友，我哋又未試過拖手，不過如果佢主動拖我，我都唔會「fing」開人哋咁無品，依家三個都係發展階段啫，我唔介意畀記者影到架，我哋成日都去中環嗰個Mall行街，咁多次未試過畀人影過。佢哋三個都唔知對方嘅存在，大家都唔識，所以佢哋一齊嚟睇我演唱會，都冇問題架，不過我一定唔會畀佢哋嚟後台探班囉，唔係因為怕佢哋碰到會尷尬，而係我唔想佢哋影響我嘅表演囉。

我覺得自己對佢哋好好架，同佢行街、睇戲、食飯，全部都係我畀錢。香港地有咁多剩女，係因為有女仔自以為是，人哋同你傾兩句，就以為對你有企圖，其實呢啲只係社交禮儀，或者係問吓路啫，有時啲女仔行街，畀人睇幾眼，就以為人哋覺得你好靚，真係好煩，就係因為咁，所以依家先咁多剩女囉。

山羊座好揀擇

我將來都會結婚架，不過我冇自由咁多年，依家單身，梗係自由吓先啦，周圍睇吓女仔先。將來嘅結婚對象，一定揀個真係好鍾意嘅先至得囉，我呢啲山羊座嘅人好專一，好揀擇架，唔會立亂嚟。結婚都會公開，亦都唔會閃電，但會唔會喺外國結（婚）就未諗。

開演唱會

為咗今次演唱會，我會喺生日嗰日出碟，呢隻碟會有一首新歌《七星岩》同翻唱林憶蓮、鄧麗君、張惠妹、許美靜嘅經典舊歌，計計吓，我已經有六年冇喺香港出碟喇。其實我嘅工作一直冇停過，只係多數喺內地，較少喺香港露面，不過我都有喺微博同歌迷、朋友溝通、玩吓，但唔會成日update。

大陸登台賺到笑

其實大陸發展真係商機處處，大陸係一個好大嘅市場，我有次接咗一個私人派對嚟唱，只係唱九個字（四十五分鐘）之嘛，就有成場演唱會咁高嘅歌酬，真係大開眼界。去大陸唱歌，真係好開心，有次去徐州一個電台獻唱，唱三首歌之嘛，已經好好好pay，同埋我都估唔到去到咁遠都有fans，講真，我係第一次去，徐州到底喺邊度我都未知，但竟然有fans揸住我第一張唱片《聽不到的說話》等我，嗰隻碟都有廿六年前咁耐，嗰一刻，我真係好感動囉，不過香港始終係我嘅發迹地，我唔會放棄香港市場。

好歌靚衫唔使舞

我都知呢期有好多實力派歌手開演唱會，有溫拿、周慧敏、鄭伊健，四月就有張學友，我覺得咁多歌手開演唱會係好事喎，因為香港演唱會飛又唔係貴，幾百蚊一張啫，喺演唱會我唔會跳舞喇，但個舞台好靚，我啲衫又靚，早排我試過一套，條領好多珠片好閃，係我開咁多次演唱會最靚嘅一套。

我唔會刻意補身，因為唔想咁肥，但會做運動，我有踏室內單車囉，啲人成日以為喺室內踏單車好悶，其實唔係架。我依家去嗰間gym house，有教練同你一齊踏，又播啲好強勁嘅跳舞音樂，同場有男有女，個個一路踏，一路聽住啲強勁音樂un un吓，好好feel架，唔同喺街踏，依家條街咁多車，好易出事架，去郊區又可能會撞山，我有位朋友參加單車賽事就發生意外，同架巴士相碰，你估個個都好似周星馳咁癲，鍾意喺馬路踏單車咩？

理想女友圈中有辦睇

呂方天生童顏巨肺，唱功了得，上得舞台入得廚房，總算圈中「筍盤」，難怪深得三位來自中、港熟女的垂青。

問到呂方「理想女友」的標準，他開出條件：「樣子要清純、唔使太靚，唔一定長頭髮，大約及肩咁啦，唔好太高或太矮，同我差唔多就得（呂方約有五呎五吋高），身材呢方面，唔好太大，我唔鍾意架，但又唔好『飛機場』。」

其實合乎呂方的擇偶條件，圈中也有不少人辦，包括有小巨肺林欣彤、與呂方同期的歌手陳慧嫻，還有陳美詩，老、中、青三代齊晒，呂方大把選擇。

林欣彤	陳慧嫻	陳美詩

口述：呂方

文：查查

攝：沈健程

場地：彌敦酒店