鄧紫棋點擊女王網盡民心
有樂壇小巨肺之稱的鄧紫棋（G.E.M.），近日在人氣網站Youtube成為點擊女王！兩年前開始將MV及生活短片上載到該網站的她，點擊率成功衝破三千萬，正身在台灣為新歌拍MV的她，接受訪問時開心不已：「真係好開心，我都係啱啱先知，仲記得第一條片係扮金魚嘴，有呢個成績不枉我花咁多時間同心機！」
她與台灣歌手林宥嘉戀情浮面，問到如此好成績可有通知對方，她說：「冇呀，呢啲嘢唔使特別講啦！」不過日前有台灣傳媒指G.E.M.親口承認「宥紫戀」，她聞言即大叫「救命」：「救命呀！我冇咁講過，我啲國語都唔係好差啫，其實我喺香港都係講同一番說話，我只係話人同人嘅關係和諧，但出嚟有唔同版本，總之我冇咁講。（你喺台灣會唔會同林宥嘉密會？）密會呢啲私人嘢，我係唔會提供資料。今次主要拍MV，太攰連踩20個鐘，食嘢都冇時間，（咁即係有冇見面？）工作上梗係冇。」