超蓮神秘撐場 柏豪愈射愈有

台灣藝人陳建州（黑人）及余文樂發起的NIKE慈善籃球賽，前晚假灣仔修頓室內運動場舉行，全場爆滿，不少歌迷舉牌支持偶像出賽，本地代表由余文樂及周柏豪帶領橫洲工業出賽，而黑人則帶埋高以翔、組合JPM的王子及毛弟、樂隊Circus的Kid及小馬等藝人落場，可謂星光熠熠。

完場趁亂鬆人

樂仔及8號仔周柏豪開場時未有太大表現，多次投射都未有得分，樂仔更愈打愈忟憎有點火爆，現場歌迷亦有點失望。直至中場休息期間，柏豪的緋聞女友何超蓮低調走入觀眾席撐場，戴住鮮黃色頸巾的她很快便被認出。超蓮在場邊目不轉睛瞄實柏豪，不時歡呼大叫又睇到「O」嘴，非常肉緊。

場中的柏豪未知是否感應到超蓮的支持，突然「米高佐敦」上身，連環入籃獲得七分，全場觀眾歡呼聲如雷貫耳，超蓮亦拍手讚許，直至完場時，她趁混亂人群中離開，未有機會一如以往跟柏豪合照留念，而同樣與柏豪傳出緋聞的何超雲前晚於微博中「呻」病。

柏豪完成賽事後接受訪問，問到是否獲超蓮撐場打得特別起勁？他說：「我本身都想叫佢睇，因為今次好有意義，係做善事，咁啱佢又想睇。（半場先到？）係，佢話我知佢有嘢做，中場嗰陣我有叫同事出去接佢。（有佢支持發力？）任何朋友到場嚟支持我，信心都會大啲！」柏豪表示超蓮坐的是免費VIP座位，但她有捐錢支持。

柏豪獲超蓮現身捧場，顯得特別落力，見人過人。	連取七分的柏豪，頓成全場焦點。	身為隊長的余文樂非常投入，身處劣勢時更見奮勇。

共籌得16萬元

慈善賽打四局後圓滿結束，以黑人為首的Love Life籃球隊組織及默契都略勝一籌，最終以77比69贏波，黑人成為全場的得分王，共取得21分，其次是擅射3分的余文樂，共取得16分，而人氣偶像高以翔、王子、毛弟、Kid等都打得有板有眼，為球隊入波獻分。是次活動籌得合共十六萬港元，全數捐到「成長希望基金會」作慈善用途。

賽事結束後，明星球員特別將球衣掟上觀眾席答謝支持，余文樂更將波鞋除低，送給來自日本的歌迷。樂仔接受訪問時否認打到忟，他表示：「冇忟，投入比賽啫，輸贏真係唔緊要，最緊要係為善事，之後會盡力同黑人去傾，到不同城市作賽，而吳彥祖都話有興趣幫手打！」

採訪：音樂組