Lillian發掘跳舞才能
「翻版吳佩慈」梁郁霖（Lillian）近來經常孖住「百果園咪神」陳靜出騷，問到拍住師姐可感壓力？她說：「之前都擔心，不過合作多咗，互相信任，熟咗就放心，私底下會食飯行街。（擔心佢搶風頭？）佢早出道過我，推出咗個人月曆，又拍戲，而我只係剛起步，所以唔會比較。」
Lillian坦言喜歡拍硬照及出騷搵真銀，但亦想嘗試躍入大銀幕，客串新片時驚奇地發掘到跳舞潛能：「本身我哋班女仔客串一場，曾志偉喺現場見到就叫我哋加入拍多一場跳舞戲，學咗五分鐘即刻拍，好彩企喺吳君如同袁詠儀附近，可以睇到排舞老師，冇甩到，反而驚踩到人，不過就發現自己跳舞幾好。」她曾習「舞」，笑說可轉型走跳舞路線：「學過基本Jazz同Hip Hop，細個學過芭蕾舞，柔軟度高，真係可以試吓唔同路線。」