OctoBeez舞出名堂
跳唱三人組合OctoBeez過去一年身兼o靚模及歌手身份，工作排得滿滿十分充實。新一年三女懷着大志，向前衝衝衝，誓要做睇得又唱得歌星。
周秀娜三位師妹Hidy（余曉彤）、Rika（王麗嘉）及Hazel（徐熙素）於去年經歷不少改變，由新八模變身跳唱組合OctoBeez，o靚模轉做歌手，難度不小。提到新一年的願望，三女異口同聲想打響名堂，首要提升唱歌及跳舞技巧，不負公司及粉絲厚望。
Hidy學普通話
本身有多年跳舞經驗的Hazel視荷里活性感女星謝茜嘉艾芭為目標，希望「舞」出名堂：「佢主演嗰套跳舞電影好正，我都想有呢個機會。（學佢做性感尤物？）係都好呀！」Hidy則希望多拍廣告搵真銀：「我哋有計劃打入內地市場，所以我要練好普通話。另外去年多咗病痛，希望新一年要健健康康。」在加拿大長大的Rika去年中隻身來港，短時間內出寫真兼唱歌，發展順利。Rika說：「時間過得好快，好感恩有咁多機會。（有咩想進步？）唱歌同跳舞都要好啲，我不斷都有上堂，同埋要練氣，連續唱幾首歌好易唔夠氣。」忙爆之餘，她亦直言想請假返多倫多見家人：「成年冇返過屋企，媽咪話唔記得我咩樣喇！」
Rika感情隨緣
人多自然多意見，問三女可有拗撬？Hidy說：「我哋三個性格唔同，我覺得可以互補不足。雖然會有自己意見，但講出嚟仲好，唔會有心病。」感情方面，有拍拖的Hazel及Hidy希望繼續甜甜蜜蜜，單身的Rika則說：「隨緣啦！見到人哋有男友錫都會羨慕，但冇得亂搵架。」
文：立影
攝：劉智源
場地及服裝：Monstar Beatz