徐子珊咀方中信冇癮
徐子珊於新劇首與方中信結緣，大讚對方非常型仔，為人搞笑兼沒架子，能夠演情侶實屬夢寐以求，惟監製安排兩人親熱程度頂多錫面，再加上方中信經常把女兒掛在口邊，難怪子珊大嘆想像空間幻滅！
兩年前拍攝的劇集《仁心解碼》終於重見天日，身為女主角的子珊當然大感高興，飾演患有精神病警察的她，拍攝前特別上網了解患者心態，望觀眾欣賞劇集的同時，亦同樣正視精神病的存在。子珊坦言一旦「病發」會自我收埋沉澱，也會透過運動來釋放體內負能量。
大讚幽默零架子
首次與方中信合作，子珊對這位已為人父的前輩讚不絕口，她謂：「方中Sir好搞笑，好幽默、好型又Keep得好好，好住家男人咁，真係好榮幸可以同佢合作，開頭見到佢有啲緊張，話晒都唔識，後來見佢講個女，覺得好溫馨吖！」子珊更指方中信不時指導她待人處事，完全沒有架子，令其壓力大減。
她坦言能夠與對方演情侶絕對夢寐以求，劇情還有一場求婚戲，沒料監製只以錫面來交代，難怪她一臉失望地謂：「下次希望有機會啦！得不到是最好的，不過對住佢真係唔會諗到浪漫兩個字，因為佢成日提個女，根本就冇晒Fantasy o架！」
撻落地周身瘀傷
談到拍攝難忘事，子珊透露有場被匪徒禁錮戲份，拍攝時手腳被綁於櫈上，她更要掙扎撻落地，結果於沒有任何保護情況下，手腳均瘀傷收場，認真慘情！雖然如此，但該劇亦讓她一嘗揸電單車滋味，她笑謂：「我冇電單車牌！所以有向方中Sir偷師，學識咗上落車都好型囉，有場戲方中Sir喺後面攬住我揸，好有《天若有情》Feel o架！」
文：影視組 攝：沈健程