徐濠縈開口想生等住造人

昨日徐濠縈、謝婷婷、姚予晴與楊崢出席Fendi春夏時裝預展，徐濠縈忍受十度低溫以春夏裝亮相，她坦言靚的背後要作出犧牲，她打趣地說：「自己由頭到腳趾尾都露出嚟，其實我昨晚知要着露趾鞋就去修甲，修完甲就着住人字拖走，啲人見到就覺得我好怪，個個都望住我，可能啲人以為我唔係潮到咁呀！而我當時上身就fur，下身就人字拖，我都笑自己九唔搭八，總之靚嘅背後就要犧牲、要捱餓同冷！」

環境未許可

老公陳奕迅快將與唱片公司約滿，有指以五億天價邀他跳槽，直問徐濠縈是否感到很開心？她說：「呢啲係辛苦錢，我聽到唔開心，因為戥佢辛苦，你收得人錢要還啲血汗，其實最緊要佢開心，唔係睇錢，總之佢身價我真係唔知，亦冇問。（覺得佢值？）一分耕耘、一分收穫，總之呢啲嘢唔係我理，係交畀佢經理人。」至於Eason有否加家用，她坦言是血汗錢，自己有時裝店，可以自給自足：「錫佢嘅人都唔想佢辛苦，佢做得開心又有空間畀佢，呢啲緊要過錢！（Eason咁忙，豈不是沒時間造人？）係呀！我自己都好忙，專心湊個女先，我OK，可以等吓，唔使擔心，雖然都想生，有時環境未必可以咁快生！」

謝婷婷愛白色，故以白色trend coat上陣，兼且可保暖。

姚予晴與楊崢都以單薄春夏新裝亮相，充分發揮名模不怕冷本色。

姚予晴凍慣

名模姚予晴亦同時捱冷以露肩裙示人，她表示做了模特兒多年，已習慣穿少衫，笑言自己有特異功能：「唔怕凍，上兩星期喺北京街頭影春夏相，當地好凍，就連路過市民都話我『牛斃了』（指她好爆），助手着羽絨返港都病，反而自己就冇事！」對於同一間模特兒公司的熊黛林被指與郭富城已訂婚一事，她坦言不知情，還笑言會幫大家問吓！

文：名人組