江若琳舞甩裙心口涼浸浸
江若琳（Elanne）日前為北京電視台春節晚會節目錄影，大跳勁舞期間，因舞衣太鬆，跳時驚覺心口涼浸浸，以為自己走光，幸好最終有驚無險，但Elanne坦言在台上差點嚇破膽。
Elanne為北京電視台錄影春節晚會節目時，因所穿舞衣是電視台安排，故不太合身。當她獻唱新歌《唯有愛》時，大跳高難度舞蹈，令台下觀眾嘩聲四起。不過精彩表演背後卻暗藏危機，因Elanne所穿的舞衣太鬆，差點跳甩裙，險出洋相。
臨時改裙頂硬上
Elanne表示：「因為呢排工作時間好緊密，冇機會試到大會安排畀我嘅tube dress，綵排嗰陣先係第一次着，但發覺好鬆，之後工作人員已經幫我改窄咗，點知到錄影嗰陣再着，都仲係好鬆，仲冇時間再改，惟有頂硬上。跳跳下嗰陣都feel到心口涼涼哋，以為條裙跌緊落嚟，不過好彩冇咋，今次真係有驚無險！」她指事前已做足防走光措施，但可惜自己近期瘦了不少，令舞衣依然「跣跣哋」，認真嚇破膽。
節目錄影完畢後，大批粉絲在場外守候，有些更圍着江若琳的座駕不願離去，令她困在車廂內十多分鐘，有粉絲更不斷拍打其車窗及高聲歡呼，最後要當地公安出面調停及疏導人群，Elanne才可離開。
春節晚會搶手貨
Elanne近年接拍內地電視劇，又進軍內地樂壇，早前更於北京推出首張國語唱片，令她在內地人氣急升，成為內地多個春節晚會的搶手貨。提到北京春晚節目表演，Elanne興奮地表示：「始終自己係第一次有份參與北京電視台嘅春晚，能夠得到大家嘅認同，真係好開心。」