林保怡獲志雲呵番順晒

林保怡、黎耀祥、謝雪心等昨日出席「無綫節目揚威國際祝捷會」，總經理陳志雲亦逐一頒予他們來自不同地方的獎項。兩位「視帝」難得碰頭，問他們兩個哪位較威水？保怡謂：「唔好講邊個威啲。」而祥仔亦謙稱謂：「我哋唔講呢啲嘢！」

「遲到好過冇到」

奪得「亞洲視帝」的保怡早前坦言覺得遭公司冷落，昨日陳志雲於台上公開表示並非薄待他，因每年招待會也是一月舉行。事後問保怡是否「順番條氣」？他得戚的謂：「咁遲到好過冇到，（陳生話冇待薄你？）係報紙寫啫嘛！咁大個人冇嘢啦！（幾時約滿無綫？）今年六月，依家傾緊約，（會唔會換嘢？）呢個獎（亞洲視帝）點換呀！呢個獎有好多國際評審評出嚟！（樂小姐有冇約你食飯傾約？）佢話食，但呢排我唔得閒食，我唔會換嘢，最緊要係錢，我好坦言，要求加錢，（想加幾多？）未諗，總之加錢同有自由度啦！（加到視帝價？）好呀！我都要諗清楚，要計埋香港啲通脹。」

林保怡與黎耀祥兩帝碰頭，識做地互相祝賀一番。

陳志雲（左）被追問崔建邦的近況時坦言未有最新消息。

讚保怡明白事理

陳志雲被問到台上一番話是否特地說給保怡聽時，他說：「我同你哋講啫！佢明嘅，（呵番佢？）佢都冇受傷，唔需要，保怡好明白事理，可能佢未必知道我哋以往呢個記者會都係一月舉行，今次係第二屆以演員單位提名，如果唔重視，就唔會提名演員啦！」

陳志雲恭賀得獎者如謝雪心（右二）等。

黎耀祥獲戲劇製作總監曾勵珍（左）及監製李添勝撐場。