Baby學修甲做體貼女友

Angelababy初嘗當老闆娘滋味,投資近百萬港元開美甲店,還找來媽咪擔任店長幫手打理。提到早前被拍到跟黃曉明在酒店泳池拍拖一事,她即甜笑封嘴,但就承認自己是個體貼細心的女友。

豬籠入水的Angelababy最近升呢做老闆娘,與三位好友合資開舖,樓高四層的M:Home昨日正式開張,其中位於三樓的就是Baby的美甲店,師妹楊汀叮更仗義擔任代言人,並一同為新店剪綵。Baby開心地表示:「呢間係我第一次開嘅舖,我好耐冇試過怯場,但頭先都有啲驚。(投資咗幾多錢?)投資咗近一百萬,我要求好高,好似啲裝修同埋啲師傅。開舖係因為我成日唔喺香港,返嚟好想修甲,不過夜又Book唔到,有自己舖頭就方便好多。(諗住幾時回本?)冇諗,最緊要係有得整指甲同有個竇畀啲朋友玩。」

密友可享免費

今次做生意可有問過男友黃曉明意見?Baby說:「冇。(佢知唔知?)我唔知,睇報紙都知啦!」她又表示男生都可修甲,她知道有個店員的心願是為羅志祥修甲,她也會盡力為對方達成心願,而朋友幫襯都可享有折扣甚至免費,看和她有多Close,問她曉明是否免費,她說:「我知佢有好多Sponsor。(你幫佢修甲?)我唔識,我遲啲都會學。(搵佢做白老鼠?)搵媽咪,媽咪都係店長。」

渡邊來港接棒

提到早前她被拍到跟曉明在酒店泳池拍拖,她餵曉明吃水果和遞毛巾一事,她即一臉甜笑地說:「不如唔好講佢。(你係咪一個體貼細心嘅女朋友?)係嘅。(曉明話如果女朋友遲到願意等佢一世,你覺唔覺好Sweet?)我哋跳出呢個話題,唔想每次出Event都提住第二個人嘅名。」

另外,於日本發展順利的Baby,一直都是潮模渡邊知夏子的宿敵,近日兩人由日本鬥到香港,據知渡邊知夏子近日悄悄來港,原來是接Baby棒、以七位數字酬金接拍「法國婚紗」廣告,連日來均在鬧市等地方冒着嚴寒,以婚紗上陣拍攝,而品牌為慰勞她更預備不少日本及香港美食。

文:名人組

聖誕假期去邊度玩?即上on.cc東方互動《享樂聖誕2010》專輯,為您一站式搜羅各類聖誕消費情報!