志偉鬧爆崔建邦：冇得原諒

Amigo「出事」後多日潛伏未見蹤影，寓所人去樓空，看來除避風頭不想家人受騷擾外，相信自己都不知如何面對一眾曾愛錫他的朋友。所謂愛之深責之切，亦師亦友的陳志雲以及恩師志偉昨日分別在兩個活動上「發聲」責Amigo。志雲昨以無綫總經理身份，帶領一眾演員參加慈善步行，首次談及「愛將」出事後的最新情況，言談間亦不「錫」他了，期間志雲與製作及資源部總監樂易玲密密斟，未知是否與崔建邦事件有關。

不再死命撐

被問到「愛將」又再出事，志雲也不再死命為他力撐，反而將崔建邦降格：「從來都係朋友、同事，愛將係你哋填上去嘅，（佢請假？）我知佢係請假，但我唔理得藝員部嘅事，（作為朋友點睇佢一錯再錯？）佢喺件事上都冇發表過咩講話，當中情況唔清楚，我亦冇問過佢，只係傾過偈，（佢有冇可能坐監？）冇提過呢啲事，只係講近況，私人事唔方便公開講，（佢心情點？）冇乜嘢。」

暫避友人家

志雲強調崔建邦沒提過發生甚麼事，只知對方已請假不返工，問到有否覺得他不懂珍惜？志雲說：「我唔方便評論有冇再闖禍，相信佢自己會處理，（對佢失望？）朋友喺呢個境況都應該支持、慰問佢，如果我話失望，就當係發生咗喇。」對於本報指崔建邦已搬離龍蝦灣寓所，志雲間接證實有其事：「佢畀傳媒追訪，精神上係會受到困擾，佢冇話搬屋，但好似唔喺屋企住，去咗朋友屋企，話怕騷擾到媽媽。」

食言再犯錯

至於恩師曾志偉，昨日為電影《我愛HK開心萬歲》拍製作特輯時，亦聲言徒弟Amigo不抵幫：「都估到你哋會問，今次阿邦好難幫，佢之前仲喺我面前講，話做番嘢會珍惜機會，同唔會再犯錯，估唔到轉頭又咁﹗」志偉雖沒有正面回應是否對Amigo感到失望，卻在記者面前責罵他「冇得原諒」。他說：「佢冇搵我，我亦冇搵佢，呢個時候佢要靜吓同三思，諗清楚日後條路點行。（會鬧佢？）咁要睇吓佢幾時打畀我嘞，如果當日梗係鬧啦。（幫佢求情？）年輕人係要畀機會，如果真係搞到上法庭都會嘅。」此外，施念慈公司旗下的Lillian、Iris、bambi及Ivy有份客串志偉新片，戲中演回自己當模特兒，四人大感好玩。

文：影視組