葉蒨文變急凍牛扒艷絕群雌

前晚沙麗從好友「最美麗港姐」朱玲玲手上接過最高榮譽「金針獎」，她多謝楊凡、老公林子祥、黃柏高之餘，更透露多年來都未正正式式多謝老公與楊凡，當年是楊凡介紹她與林子祥認識，問她楊凡是不是他們的媒人？沙麗直言當年對阿Lam無一見鍾情。對於與阿Lam先後獲得「金針獎」，沙麗坦言感到開心，但未想到如何慶祝。

唔知朱玲玲娶新抱

沙麗又爆一段陳年趣事，她透露當年是楊凡逼她出唱片，又邀朱玲玲拍戲，所以前晚楊凡說一個聽話，一個唔聽話，幸好兩人現時都好開心，朱玲玲聽罷即哈哈大笑。

前晚天氣寒冷，大約得十度，沙麗笑言大前晚去綵排時凍到似塊牛扒，她說：「覺得自己凍到好似雪櫃入面一件牛扒咁，好彩正式演出前我攞咗個呼拉圈去熱身，唔覺得凍，我爹哋、媽咪就着到好似北極熊咁。」

沙麗更自爆身體出現問題，患有糖尿病，此病屬家族遺傳，故其醫生叫她戒口，不可食甜及澱粉質。問她可知好友朱玲玲傳將飲新抱茶？她說不知，相信朱玲玲也不清楚，她只見過郭晶晶一次。而一直以來不少人邀她開個唱，得到「金針獎」後更多，她仍在考慮中。

着出潮流 陳奕迅全黑上陣，穿上皮褸配冷手套，做出多種層次感，尤其係又長又粗嘅冷頸巾，着出男裝潮流。	仲差啲啲 近年歐洲嘅男仔都趨向着斗篷，張敬軒着得好好睇，不過就唔夠details，佢其實可以再好啲。	索爆戰衣 關心妍條裙係咁多個女歌手中最好睇，亦都好適合佢嘅身形，睇得出佢係好尊重呢個場合。
似去滑雪 謝安琪的配搭顏色雖然好搶眼，不過似滑雪多過去攞獎，全場最差！	宮廷風格 朱玲玲件Valentino Lace衫充滿維多利亞時代宮廷風格，切合佢嘅身份，亦冇搶風頭。	得意冬菇 薛凱琪個冬菇頭幾得意，令佢好可愛，太成熟嘅衫就唔配個髮型，加多條頸巾或戴頸鏈會好啲。

前輩歌手更懂衣着

另外，時裝設計師郭慶彬盛讚沙麗衣着有大將之風，sexy得恰如其分，完全是攞大獎的style，他說：「年代唔同，以前嘅歌星比依家嘅更識得着衫，沙麗嘅打扮不但性感亦有大將之風，就如格林美音樂獎嘅巨星先會咁着！」而謝安琪的打扮評為全場最差，他說：「可能天氣太凍，佢似滑雪多過似去攞獎！」

文：音樂組