杜宇航陳嘉桓EQ精讀班

整容？我可以接受

不少人都覺得娛樂圈是一個大染缸，濫藥、整容消息時有所聞，有些女星捱不了初入行時，有名未有利的苦困，更會出席一些富豪飯局賺外快，兩位新丁又有無試過這些魔鬼誘惑？

Rose：我都聽過有模特兒食毒品減肥，以前返學都有見過同學返內地去啲迷幻派對，但我覺得濫藥好傻，喺人面前失常咁笑咁喊，好奇怪。

杜：我係運動員出身，食藥會好小心，禁藥一定唔會食，呢啲係習慣嚟，我連煙都唔食，不過，有時都會飲吓酒。

拒出席富豪飯局

Rose：講到整容，我可以接受到嘅，但當然唔可以整到成個樣唔同咗，好似面形由方變尖，陳嘉桓個樣變成杜宇航咁，就梗係完全接受唔到。

杜：咁誇張？我都接受唔到，但其實身邊人如果有咁嘅選擇，我覺得無所謂，佢哋有權咁做，但我呢，觀眾都睇咗我咁耐，知我行實力，樣貌係點無所謂。

Rose：我都聽過好多人講乜嘢富豪飯局，但我未收過呢啲電話，聽人講多啲，其實如果經朋友介紹，大家只係想做個朋友食餐飯，我覺得無問題，亦唔會理對方係乜嘢身份，但如果食餐飯有錢收就好奇怪，唔會去呢啲飯局。

合作巨星逐個講

杜宇航與陳嘉桓於影壇發展相當不俗，入行不久，便在電影中擔正，合作的人物更是粒粒巨星，身在福中的他們，很感激每位幫過他們的人，亦對每位巨星對工作的堅持，由心佩服。

杜：之前同成龍大哥合作《辛亥革命》，佢拍戲嘅時候，我有去現場睇拍戲，佢真係好認真，拍呢套戲亦拍得好辛苦，有一場戲係喺一個煤廠入面，沙塵飛揚，吸嘅都係煤同塵已經好辛苦，仲要加埋拍爆炸再加風吹，仲要拍足十二小時，辛苦程度可想而知，所以，成龍為咗呢部戲真係付出好多，佢嘅專業態度，亦令我好佩服。除咗成龍之外，我亦有同房祖名合作，我覺得佢好好人，對武術亦好有興趣，佢仲有叫我教佢擺一啲武打甫士。之前喺內地拍邱禮濤一套古裝片，亦都拍得好開心，同秋生哥（指黃秋生）好啱傾，我都有請教佢演戲嘅技巧，學到好多嘢，佢話返香港再搵佢飲茶傾偈，佢話好多都帶唔走，真係好肯教，好多謝佢。

Rose：我都有遇到好前輩，好似夏文汐咁，開頭合作拍戲，一聽個名，唔係好認識，之後問同事，知道原來佢係一代性感女星，佢真人仲keep得好好，一啲都唔似生過三個女，我做戲嘅時候，如果佢發現有唔妥，會即刻教我，拍到尾聲嘅時候，佢仲問我想唔想手提電話最後四個字用番自己嘅生日數字，話可以幫我搞，真係好好。

連保安都「驅逐」我

Rose：最初入行嘅時候，都試過畀同行奚落過，有一次，我着高踭鞋出席一個活動，啲記者未嚟之前，大會攝影叫我同另一位藝人影相，點知佢望一望我，然後就冷冰冰咁講咗一句：「你咁高唔同你影呀」。然後走開咗，雖然好尷尬，但我都繼續笑着影相，之後工作人員問番我點解唔嬲，我覺得無辦法，呢個係佢選擇，我嚟活動當然要着靚靚，佢咁樣做，反而係佢唔好睇。

杜：我哋新入行，出席大活動當然試過被冷落，但對我嚟講，無乜所謂，可以參與盛事已經好好，一個場合咁多藝人出嚟，無可能訪問得晒，就算訪問到都未必出到，好似出席金像獎頒獎禮，咁多巨星喺度，點會訪問到我？但能夠參與呢件盛事，見到好多巨星前輩，已經好開心，冷落唔係問題。

曾淪為路人甲

Rose：我都好認同師兄（指杜宇航）所講，能夠去到啲大嘅活動，已經好開心，但有時我聽到有啲活動，連保安都未必認得個星，咁師兄有無試過畀人當「路人甲」？

杜：試過架，出活動做嘉賓，但啲保安唔識我，叫我行開唔好阻住，我咪行開，當時我同自己講，努力啲下次佢咪識得我囉！我亦都明白同行如敵國，初初入行拍戲嘅時候，都有過一啲閒言閒語，記得自己之前拍一套好多大卡士嘅戲，但因入組嘅時候，我有啲事要遲啲入去，有啲人就係背後話我：「世界冠軍就可以遲啲嚟呀，扮晒嘢！」埋組之後，對我嘅態度亦唔係咁好，但後尾相處落，知我個人係點樣，對我嘅態度亦慢慢變好。

後記：減壓良方

杜宇航、陳嘉桓同是習武之人，真的很想知道，「武林中人」的減壓方法，會不會就是向着沙包狂擊猛打？陳嘉桓笑言：「唔會，我會選擇同狗仔傾偈，因為我有三隻狗仔，有唔同性格，可以依佢哋性格嚟傾偈，我喊嘅時候，狗仔會幫我抹眼淚，反而朋友唔能夠令我暢所欲言，因為我好唔想講咗啲嘢，會傳番出去，同狗仔講最安全。」杜宇航則很多時會靠自己意志來調節心境，凡事以正面態度去處理壓力，若果想出一身汗，他會選擇慢跑，感覺舒服。

採訪：影視組

攝影：黃叔榮

服裝：GAY GIAN